مرت الايام بطيئة على سهى وزينات تتفنن فى اهانتها وذلها بأى طريقة ممكنة بينما كانت هبة الملاك الحارس الذى ينقذها من براثن زينات اغلب الأوقات
كان حسن حنونا عليها وقد صدق وعده لأبيها فقد قدم لها العديد من الهدايا الذهبية التى كانت تخبئها خوفا من بطش زينات حتى مر شهرين على الزفاف وقد استأذنت سهى من زوجها لزيارة ابيها وحين عادت وجدت زينات بشقتها
اغتالوا براءتى
بقلم قسمة الشبينى
الخامس
دخلت سهى من الباب لتفاجئ ب زينات تجلس وتضع أمامها كل ما أهداها حسن من مشغولات ذهبية ليظهر عليها الخوف فورا بينما هبت زينات واقفة لتشدها من طرحتها فتمزقها وهى تقول: بقى دى اخرتها يا بنت الفران بقى يلمك ويأويكى فى بيته وانتى تسرقيه
سهى بخوف: والله ما حصل يا خالتى والله ما خدت حاجة
زينات: امال جبتى المجوهرات ده كله منين ها هتستهبلى دا احنا جايبينك بشنطة هدومك يا الفقيرة بدأت زينات تضربها وسهى تبكى
كانت هبة بالمطبخ تعمل على إعداد طعام الغداء حين سمعت صوت امها وهى تسب سهى
نفضت يديها فورا وتوجهت للأعلى وهى تتمتم: استغفر الله العظيم مفيش فايدة يا اما مش هتسيى البت فى حالها
وصلت للباب وبدأت بالطرق عليه وهى تقول: يا اما حرام عليكى افتحى يا اما سيبى البت هتموتيها
لم تهتم زينات لطرقات ابنتها بينما اخذت تفرغ شحنة حقدها من سهى بضربها أخرجت هبة هاتفها وطلبت شقيقها الذى أجاب فورا
هبة: انت فين يا حسن
حسن: ابدا انا فى الموقف مستنى الدور علشان اطلع هعمل اخر بنديرة وجاى
هبة بصراخ: سيبك من الدور والزفت امك بتضرب مراتك وقافلة الباب إلحقنا يا حسن
حسن بلهفة: عشر دقايق واكون عندك
وصل حسن يدفعه الغضب ليجد الوضع كما هو صعد الدرجات بسرعة ليجد هبة تقف على الباب فتح الباب واندفع يرفع امه عن سهى التى تقطعت خصلات شعرها بين يدى زينات التى تقول: البت دى ما تباتش فى البيت الليلة ال…….ال……..
حسن بإنفعال: اما ما اسمعش كلمة تانية على مراتى
ضم سهى لصدره وهبة تربت على ظهرها بحنان وهو يقول: سرقت منك ايه يا اما علشان تقولى عليها كدة وحتى لو سرقت مش ليها راجل يترد عليه ولا انا طيشة يا اما تضربى مراتى بالشكل ده وانا مش موجود
زينات وهى تشير للذهب : اتفضل يا سى حسن بتسرق فلوسك وتشترى دهب شايف معاها دهب قد ايه
حسن: مراتى مش حرامية يا اما وده دهبها انا جايبهولها
صعقت زينات: ايه انت جابيبهولها وده امته يا سى حسن بتخبى على امك
حسن: الى بينى وبين مراتى ملكيش فيه يا اما وانا دلوقتي مش مأمنك عليها كمان
زينات: يعنى ايه مش مأمنى عليها هو انا عملت لها ايه ماكانوش قلمين انضربتهم
حسن بتهكم: قلمين ماشى يا اما متشكرين عموما مراتى مش نازلة لك تحت تانى هتقعد فى شقتها
ضربت زينات على صدرها: انت بتنصر مراتك عليا يا ابن بطنى يا خسارة تعبى فيك
حسن: اما مالوش لازمه الكلام ده
وجذب سهى من يدها للطاولة وبدأ فى إلباسها كل المشغولات الذهبية وهو يقول لها بحنان: من هنا ورايح دهبك ما يتقلعش من ايدك ماشى يا سهى
هزت رأسها بنعم
فقال: وماتنزليش تحت إلا بأمرى فاهمة
سهى وهى تنظر ل زينات بخوف: حاضر
رفع صوته وقال: وطول ما انا برة البيت باب الشقة ماتفتحيهوش غير ل هبة اختى سامعة يا سهى
هزت رأسها بنعم
زينات: حسبى الله ونعم الوكيل فيك يا حسن بقى دى اخرة كسرة شبابى عليك انت واختك تنصر عليا حتت عيلة ما تسواش
كانت تصرخ بهذة الكلمات وهى تتجه لشقتها بينما أسرعت هبة ل سهى تربت على ظهرها بحنان وتقول: تعالى معايا يا حبيبتي اغسلى وشك وغيرى هدومك
تبعتها سهى بصمت بينما توجه حسن لأحد المقاعد ليرتمى عليه وهو يسند رأسه إلى كفيه بحزن
