فى غرفة ورد
تجلس ورد بفراشها وهى تحمل مولودها بينما حكيم يعدل من وضع الوسائد خلف ظهرها وهو يقول بحنان : حمدالله على سلامة ورد الجناين
ورد بابتسامة : يسلملى القلب الحنين
حكيم وهو يقبل رأسها ويجلس بجوارها : ها هتسميه ايه
ورد : أنا سميت نوارة ، العدل أن انت اللى تسمى اخوها
حكيم : انا وانتى واحد ياحبيبتى
ورد : مافيش فى دماغى اسم معين ، وحابة أن انت اللى تسميه
ولا انتى ولا هو …انا اللى هسميه
ليلتفتوا على صوت صفية وهى تضحك وتدخل لتختطف الصغير من أحضان ورد وتقول : ده حبيب صفية وصفية هى اللى هاتسميه
ورد ضاحكة : هانى اللى عندك يا ست صفية ، اشجينى
صفية وهى تقبل وجنة الصغير : زين …سموه زين ياورد
ليتبادل حكيم وورد النظرات بشجن ليقف حكيم وهو يقول بحنان : بس انتى كنتى عاوزة تسمى ابنك زين ياصفية
صفية بصدق : وابنك ابنى ياحكيم ، وانا عاوزة اسميه زين ، ثم ضحكت قائلة : ولو ماسمعتوش الكلام هجننلكم الواد وهخليه مايعرفلوش اسم …قلتوا ايه بقى
ورد بضحك : لا وعلى ايه الطيب احسن ، واسم زين جميل فعلا ياصفية ، ثم أكملت وهى تنظر لحكيم : ها يا ابو زين ..اديك عرفت اسمه ياللا بقى روح سجله وهاتلى شهادة الميلاد عشان اعرف مواعيد التطعيم بتاعته
صفية ضاحكة : ولادك هتبقى واحدة امريكانية وواحد صعيدى ياورد
ورد : وانا صعيدية واتشرف بالصعيد ياست صفية …. اومال عمى عتمان فين
حكيم بأسى : مابقاش يقدر على طلوع السلم ياورد ، لما تشدى انتى حيلك أن شاء الله تبقى تنزليله
صفية : ياللا اتكل على الله روح طلع الشهادة وانا هفضل مع ورد على ما ماما تطلعها الاكل
…………………….
عند هبوط حكيم إلى الاسفل يجد والده يجلس فى صمت وهو ينظر إلى الخارج من خلال الشرفة فى شرود ليقبل حكيم رأسه وهو يقول : ايه اللى شاغل سيد الناس اوى كده
ليلتفت عتمان إلى ولده قائلا بتنهيدة عميقة : ماتشغلش بالك يابنى وماتعكرش فرحتك بابنك ، انت هاتسميه ايه صحيح
حكيم بابتسامة : صفية سمته زين
ليومئ عتمان رأسه بحزن قائلا : ربنا يجعله لك زين طول العمر يا بنى
حكيم بتوجس : مالك ياحاج
عتمان : سلامتك يابنى ، انت كنت رايح على فين كده وسايب مراتك
حكيم : صفية قالتلى اروح استخرج لزين شهادة الميلاد وارجع وهى هتفضل شوية مع ورد
عتمان : صح كده ، ياللا اتوكل على الله والحق وقتك
حكيم : بس انت فى حاجة شغلاك ، وحاجة كبيرة كمان
عتمان : اتوكل على الله يابنى روح مشوارك وبعدين لما ترجع بالسلامة نبقى نتكلم
…………………..
فى غرفة ورد
تدخل حكمت وبصحبتها نوارة التى كانت تتقافز بسعادة فى صحبة جدتها
حكمت : ها يابنات …ايه الاخبار طمنونى
صفية ضاحكة : زين بخير ياماما
حكمت باستغراب : زين !
ورد بمرح : أيوة ياماما ..صفية صممت هى اللى تسمى الولد زين قوة واقتدار
حكمت بابتسامة حنونة : ربنا يخليكم لبعض يا اولاد ، ويجعلكم دايما سند وعون لبعضيكم
نوارة : يعنى انا دلوقتى اخويا اسمه زين واللا قوة واقتدار
لتنقض صفية بالتقبيل والدغدغة على نوارة وهى تقول : ده انا اللى هاكلك قوة واقتدار ، مش كفاية امريكانية..كمان عسلية يابنت ورد
لتدمع عينا حكمت وهى تنظر لابنتها بشفقة لتتمتم ورد بالكثير من الأدعية لصفية ، لعل الله يفرج كربها