_ليه يا ماما في ايه وأقوم البس عشان مين؟
لقيتها بتقول لي وعيونها بتتنطط من الفرحه:
_في شاب طول بعرض قاعد بره وبيقول ان ابن وزير وباين عليه من العربيه اللي راكبها والبادي جاردات اللي جايين معاه وجاي يطلبك من باباكي.
انا كأن سهم الله وقع علي راسي وما توقعتش ولا جه في بالي ان عدي يجي لحد هنا ويطلب ايدي من بابا ما بقتش عارفه ارد على ماما اقول لها ايه وهي عماله تلح عليا وتطلع لي الهدوم لقيتني بلبس وانا في عالم تاني خالص وخرجت كأني مغيبه،
لقيتهو وبابا متفاهمين مع بعض جدا في الكلام وكان اخر حاجه سمعتها منه خلتني انتبه:
_انا جاي لحضرتك زياره مبدئيه كده يا عمي ولو حصل موافقه مبدئيا هجيب بابا وماما ونيجي نطلب ايد الانسه صبا ايه رايك ؟
سمعت بابا بيرد عليه وهو مبتسم جدا:
_الراي طبعا راي صبا اما أنا يبني استريحت لك من اول ما شفتك وما عنديش اي مانع بس لما صبا تقول رايها .
ولقيت بابا بيقوم وهو بيقول لماما:
_تعالي يا ام صبا نسيبهم يتعرفوا على بعض هنقعد قدامهم في في البلكونه انا وانتي .
ومن ساعه ما سمعت بابا وهو بيقول الكلمتين دول وهيسيبني اقعد معاه لوحدنا وانا قلبي ما بطلش دقات مش دقات اعجاب خالص دقات خوف ورهبه ومش عارفه هقول ايه،
لقيته قام من مكانه وقعد قدامي وراعي طبعا فرق المسافات لانه عرف ان انا التزمت جدا وما بسمحش باي تجاوزات واتكلم وهو بيبص لي بكل الحب:
_اتفاجئتي طبعا يا صبا بالحركه اللي انا عملتها دي معلش سامحيني ما كانش قدامي حل ثاني معاكي غير كده بقى لي سنتين وزيادة بجري وراكي وانتي مش راضيه تدينا فرصه خالص ان احنا نقرب لبعض ونتعرف على بعض وتفتحي قلبك من جديد للحب وللحياه .
ما بقتش عارفه ارد عليه اقول له ايه متوتره واعصابي مشدوده وكمان متفاجاه من حركته دي زي ما هو ما قال ولقيتني بتكلم تلقائي:
_انت مفكر ان بمجيتك هنا بتحطيني قدام الامر الواقع يا عدي ،
انت بتظلم نفسك كده معايا علشان انا عرفتك كتير اني مش بفكر فيك وانك بالنسبه لي زميل دراسه مش اكتر ولا اقل .
ما حسيتهوش زعل من كلامي او بمعنى اصح بقى واخد عليه ورد عليا بكل هدوء:
_مهما تقولي ومهما تحاولي توصلي لي انا مصمم عليك يا صبا حرام عليك بقى كفايه كده انا يا ستي بحبك انت ومش عايز غيرك انت وكمان هديكي فرصه انك تعرفيني وتحبيني مش عايز منك اعتراف على طول بس اديني فرصه .
بصراحه ما كنتش عارفه اخذ قرار ولا افكر ولا اركز وسبته يتكلم لحد ما بابا وماما جم وفضلوا يتكلموا معاه وخلصت القاعده واستاذن ومشي على اساس ان بابا هيرد عليه القرار النهائي ليا،
وبعد ما مشي بابا وماما ما رضيوش يتكلموا معايا ابدا في الموضوع ده لحد ما عدى يومين اعصابي فيهم هديت شويه وبابا لاحظ كده وجه طلب ان هو يتكلم معايا وسمعته وقال كلام نوعا ما منطقي،
لقيته بينصحني بكل هدوء:
_شوفي يا بنتي اللي مات ابن اخويا قبل ما يكون خطيبك وفي منزله ابني بالظبط وانت عارفه انا كنت بعزه قد ايه لكن الدنيا ما بتقفش وهو راح عند ربنا سبحانه وتعالى شهيد بيتمتع في الجنه مع الحور العين وانت هنا قافله على نفسك بقفل صعب قوي الحقي نفسك يا بنتي قبل القفل ما يصدي ما نعرفش نفتحه .
كلام بابا هزني وحسيت بكل كلمه وهو بيقولها ولقيتني برد عليه:
_يعني اعمل ايه يا بابا مش قادره اتخطى عامر من حياتي ولا قادره انساه.
طب طب على ضهري ومسك ايديا وقعد يفهمني بهدوء:
_شوفي يا صبا انا عايزك تفكري بالعقل يا بنتي ما تعيشيش جوه دوامه الحزن كثير علشان الحزن ما يفارقكيش ويختارك انت يبقى دارك ومقدارك سكي على الحزن بقفل الرضا افتحي قلبك انا ما بقولكيش وافقي على عدي لكن ادي له فرصه انا شايفه ولد كويس وابن ناس وشايف في عيونه التمسك بيكي .
وفضل يتكلم معايا كتير وكلامه كله اثر فيا وحسيت ان انا بعد القعده دي مع بابا وكلامه اللي اول مره يقوله لي بتاثير وبتغيير جدا ،
ولأول مره قررت ادي عدي فرصه وادخله حياتي وبلغت بابا اني موافقه على خطوبه لحد ما هشوف هعرف اتاقلم معاه ولا لا وعدي ما صدقش نفسه لما بابا بلغه وما فيش يومين ولقيته جايب باباه ومامته وطبعا كانوا جايين بحافله وماما كان عاجبها الحوار جداً ومش مصدقة نفسها وطول ماهما طالعين عماله تطبطب عليا وتقول لي:
_ تستاهليها والله يا بنتي ربنا جبر قلبك وجبر خاطرك ربنا يسعدك ويكتب لك الخير كله .
وطلع عدي وباباه ومامته ودخلوا واتعرفت عليهم وحسيت بارتياح جدا ناحيه عيلته ومامته اعجبت جدا ان انا محجبه وما كانتش متخيله ان عدي في يوم من الايام كان يتجوز واحده محجبه وقالتها كده بالنص ،
اتفقوا على كل حاجه وانا كنت طالبه من بابا سنتين خطوبه لحد ما اخلص الجامعه وكمان علشان اقدر احكم على شخصيته واشوف اذا كنا هنقدر نكمل مع بعض ولا لا،
وبعد ما خلصوا كلامهم بابا سابنا قعدنا مع بعض شويه واتكلم فيها عدي كتير انه مش مصدق نفسه وان هو كان يا ريته خد الخطوه دي من زمان،
والايام بتمر ما بيني وما بينه طبيعيه وهاديه جدا ولاحظت فيه ان هو مراعي عدم اعجابي به وما لقيتهوش زعل ولا متسرع وده خلاه كسب بونت عندي،
لحد ما في يوم كنا بنتكلم مع بعض في التليفون ما كنتش بكلمه كتير لكن دي مره من المرات وبيقول لي بحب :
_انا بحبك قوي يا صبا بس حاسس انك لسه ما جيتيش مرحله الاعجاب حتى ليا ارجوك يا صبا افتحي لي قلبك وقولي لي على اوجاعك وانا وانت نحاول نفهم بعض يمكن لما كل واحد يقول اللي في قلبه للتاني نقرب اكتر .
سالني السؤال اللي كنت محتاره جدا في اجابته بس هو طلب مني الصراحه وطالما احنا ارتبطنا يبقى كل حاجه بينا لازم تكون على نور وجاوبته بكل صراحه:
_هتصدقني لو قلت لك ان جزء جوايا بيفكرني بالماضي وجزء ثاني بيقول لي من حقك تعيشي والجزئين بقوا بيتخانقوا معايا جوايا ومش عارفه اهدي مين فيهم او اخلي مين ينتصر انت قلت لي قولي الصراحه وانا قلت لك الصراحه .
كان لازم يتفهم كلامها رغم انه موجوع قوي من اعترافها لكن هو عرف انه طريق صعب مع صبا ولازم يكمل فيه لانه حقيقي بيعشقها وطمنها:
_ على فكره كل اللي انت بتمري بيه بيدل على انك انسانه اصيله وبيخليني اتمسك بيكي اكتر ياحبيبتي واللي انت فيه برده طبيعي جدا بس طالب منك تفتحي قلبك تدينا فرصه تانيه في علاقتنا علشان تقدري تداوي جرح قلبك وحزنه هتقدري تديني فرصه تانيه يا صبا ؟
ما انكرش انه عجبني رده جدا وانه ما تعصبش وتفهمني قوي ودي كانت اول مره اشوف فيها عدي بصوره معتدله وحسيت ان هو فعلا ممكن يكون له مكان في حياتي،
ولقيتني برد عليه باللي برده حاسه بيه :
_كلامك ريحني قوي وحسيت انه دخل قلبي يا عدي بس عايزه اسالك سؤال وترد عليا بصراحه هتستحملني وهتصبر معايا لحد ما اتخطى المرحله دي من حياتي؟
عدي لحظة ماسمعني حس بالامل وقلبه بقى يدق ومش مصدق اني استوعبت كلامه وفورا
لقيته بيقول لي:
_والله لو هصبر عليكي العمر كله ما هكل ولا همل يا عمري وصدقيني لو لفيتي الدنيا كلها مش هتلاقي حد يحبك قدي يا صبا .
وفضلنا نتكلم مع بعض في المره دي بالذات ولاول مره اتكلم معاه كتير ونقعد مطولين في المكالمه قوي كده وبدات اتجاوب معاه واحده واحده وبدا يسحبني للعالم بتاعه وكان دعوات بابا وماما ان ربنا يريح قلبي ويسعدني وكمان التزامي وقربي من ربنا ريح قلبي شويه ،
ومرت الايام ما بينا واحنا كل يوم بنكلم بعض وهو بيحاول يقرب مني اكتر وبيعمل لي مفاجات كثير عشان يساعدني وكمان اهله طيبين قوي مش شكل الطبقه اللي بتطلع في التلفزيون وعلى مواقع التواصل الاجتماعي المتكبره خالص دول كانوا بيحبوني جدا وبيعاملوني زي بنتهم بالظبط وده كان سبب من الاسباب اللي مطمني وخلي الارتياح يسكن قلبي ،
لحد في يوم ما صحيت من النوم على صوت ماما وهي بتصحيني بلهفه انا عادتي اني بصحى متاخر كنا تقريبا تلاتة العصر فاتكلمت وانا تايهه في النوم:
_في ايه يا ماما بتصحيني ليه انا مصليه صلواتي كلها .
لقيت ماما بتخبط على كتفي بحنيه وبتشيل الغطاء من عليا وبتشدي ايدي وبتقول لي:
_قومي بس خشي الحمام خدي شاور والبسي واخرجي علشان في مفاجاه حلوه ليكي يا قلبي .
اول ما سمعت كده حسيت بريحه عدي ما انا ما قلتلكمش ان انا بقيت بحبه جدا واتعلقت بيه وبقيت بحس بوجوده وده نتيجه حنيته وحبه الشديد ليا ،
قمت من النوم واخدت شاور ولبست دريس جميل وحجابي ظبطته على الاخر وخرجت اشوف المفاجاه اللي ماما منبهره بيها ،
وفعلا اول ما خرجت انا كمان انبهرت لقيت المكان كله متزين وبلالين واستيكر كبير مفروض على الحيطه مكتوب عليه :
_كل سنه وانت طيبه يا حبيبتي وعقبال مليون سنه في هنا وسعاده يا رب .
والشمع والاضواء اللي عاملها لي عدي كانت مبهره جدا ما كنتش فاكره اصلا عيد ميلادي وهو بصراحه بهرني وما استناش لي بالليل علشان عرف ان انا ببقى نايمه وكان عايز يصحيني على مفاجاه وطبعا كان لازم اشكره على تعبه وعلى انه افتكرني وقدرني فرحت وقفت قدامه وبعيون بتلمع بالحب قلت له:
_ياه يا حبيبي انا مش مصدقه ان انت افتكرت عيد ميلادي وعرفته وعملت لي المفاجاه دي كلها؟
عدي قلبه دق ولقيته وقف قدامي وبص لي بعيون كلها حب وعشق وغرام واتكلم:
_معقوله طلعت من قلبك ولسانك نطقها وعيونك ترجمتها وصلتني يا نور عيني .
ساعه ما قال كلامه ده رجعت بذاكرتي لدقيقه واحده بس وافتكرت ان انا قلت له يا حبيبي من غير ما اكون مصطنعاها ده طلعت مني كده معقوله انا بقيت بحب عدي ونسيت عامر حسيت بلمحه حزن في قلبي لكن لما لقيته واقف قدامي وعامل لي كل ده ما قدرتش اكـ,ـسره ورديت عليه :
_ايوه حبيبي اللي عمل المستحيل عشان يسعدني ليه ما اقولهاش ربنا يخليك لقلبي يا عدي وما يحرمنيش منك ابدا وبجد المفاجاه بسطتني جدا وخلت نفسيتي في السما وخليتني مبسوطه قوي .
لقيته قرب مني مع برده مراعاه فرق المسافات وتكلم وهو باصص جوه عيوني:
_نفسي اسمعها منك صريحه وتقولي لي بحبك يا عدي .
لقيت لساني بينطقها لوحده ورديت عليه:
_بحبك يا عدي ونفسي اكمل حياتي معاك.
= قلب عدي وروحه وعمره كله ياه اخيرا قلتيها واخيرا سمعتها مش مصدق روحي امانه عليك ما تحرميني منها تاني .
_ بس بقى ما تكسفنيش انت عارف اني بتحرج يا ريت انت بس ما تسمعهاش مني وبعد كده تزهق وما تقولهاش تاني زي كل الرجاله .
=صعب العافر سنين علشان يكون جوهره ولما تيجي في ايديه يفرط فيها صدقيني الجوهرة اللي شكلك بتتحط في العين والروح طول العمر .
_ياه يا عدي ما كنتش اعرف ان انت بتحبني قوي كده وان قلبك متعلق بقلبي للدرجه دي .
=لا لازم تعرفي ان من اول موقف حصل ما بينا وانت داخله الجامعه البنت الصغيره اللي خارجه من الثانوي وقعت بغرامها وحبيتها ولما عرفت انها مخطوبه قلبي فضل يوجعني قوي وما بقتش عارف اعيش ولحد ما اخدت خطوه خطوبتنا وانا كنت ضايع من غيرك يا حبيبتي .
_حبك جميل قوي تحس فيه بعطاء وتضحيه حساهم كتير عليا قوي يا عدي .
=ما تقوليش كده يا قلب عدي وعمري كله لو الدنيا كلها اجيبها بين ايديكي مش هتكفي وجود لحظة حلوه اعيشها معاكي ووياكي وليكي .
وخلاص الحب دق قلبي وقدرت اتخطى عامر وبقى له ذكري هفضل افتكرها وادعي له لحد ما اقابل وجه رب كريم وعدي قدر يحتويني واتجوزنا ودايما قلبه عليا وحتى لما بنتخانق ما يعديش اليوم الا لما يكون مصالحني ومراضيني بجد انا محظوظه بوجود عدي في حياتي وان ربنا اكرمني بيه وبقى نصيبي الحلو من الدنيا .
انتهى الاسكريبت
فاطيما يوسف
