نوڤيلا
الحلقه الرابعه
❤لوعة عشق❤
بقلم سحر فرج
الام كانت فى المطبخ بتعمل الغدا وسمعت باب الشقه بيخبط فراحت بسرعه علشان تفتح علشان امال ما تصحاش من نومها وهى تعبانه .
فتحت الام الباب وشافت شاب واقف وشايل بوكيه ورد فى أيده وكام شنطه تانى فى.
الام باستغراب بصتله وقالت .. مين حضرتك وعاوز مين يا ابنى ؟
شريف ابتسم ورد وقال .. اهلا يا حاجه انا شريف كمال مدير امال فى الشركه وكنت جاى اطمن عليها اذا سمحتى.
الام ردت وقالت .. اهلا وسهلا يا ابنى اتفضل ادخل استريح عقبال ما اصحى امال لانها دخلت تنام شويه .
وفعلا شريف دخل والام رحبت بيه وبصت لوالدتها وقال .. امال عامله ايه دلوقتى يا حاجه يارب تكون بخير ؟
الام .. الحمد لله يا ابنى هى يا دوبك لسه جايه من شويه ودخلت على اوضتها علشان تستريح .
وحكت ليا على اللى حصل معاها ومتشكرين لتعبك يا ابنى معاها .
شريف بصلها وقال .. والله يا حاجه ما كنت اقصد خالص وانا خارج من المكتب بتاع والدى ولقيتها فجاه فى وشى ومعاها القهوة وبعدين ولا تعب ولا حاجه دى اقل حاجه قدرت اقوم بيها مع امال .
الام ردت وقالت .. حصل خير يا ابنى الحمد لله على كل شىء .
تحب تشرب ايه قهوة ولا حاجه ساقعه؟؟
شريف بصلها وقال .. ما تتعبيش نفسك يا حاجه انا هاطمن على امال وامشى على طول علشان بابا عاوز هو كمان يطمن عليها .
الام بكل حنيه وطيبه ردت وقالت.. ثانيه واحده وهادخل اناديها من اوضتها .
شريف رد وقال .. اتفضلى حضرتك.
الام راحت على اوضه امال اللى كانت داخت فى النوم من التعب وبدأت تصحيها بشويش .. امال اااامال
قومى يا بنتى فى ضيوف عاوزينك بره .
امال بصتلها بنصف عين وقالت .. مين بس يا ماما اللى عاوزينى سبينى انام شويه .
الام ردت وقالت .. شريف بيه المدير بتاع الشركه برة وجاى علشان يطمن عليكى .
امال بصدمه قعدت بسرعه وقالت.. ايه بتقولى مين يا ماما ؟ شريف برة وعاوز يطمن عليا .
ده جه ليه ده وعاوز ايه منى ومش كفايه اللى بيعمله معايا
الام ردت وقالت .. اهدى يا بنتى هايكون جاى ليه يعنى اكيد علشان يطمن عليكى ويشوفك عامله ايه وعيب ما يصحش الراجل جه لحد بيتك وجايب حاجات اد كده معاه قومى وغيرى لبسك ده عقبال ما اروح اعمله حاجه يشربها .
قامت امال بسرعه من السرير وطلبت من مامتها انها تخرج تقعد معاه عقبال لما تغير هدومها وتطلع تسلم عليه وتقدمله هى حاجه يشربها .
وفعلا خرجت الام وراحت قعدت مع شريف وبعد شويه خرجت امال وسلمت على شريف اللى اول ما شافها قام وقف وسلم عليها وهو مبتسم .
شريف عيونه مركزه عليها وقال.. عامله ايه دلوقتى يا امال.
امال بكل خجل ردت وقالت .. الحمد لله يا شريف بيه احسن بكتير .
الام ردت وقالت .. اروح انا بقى وأجهز الغدا لازم نتغدا مع بعض يا استاذ شريف .
شريف بصلها وقال .. لا يا افندم ما تتعبيش نفسك انا شويه وهامشى على طول .
الام ردت وقالت .. وده يصح يا ابنى احنا ناس تعرف فى الواجب والأصول كويس ولا احنا مش اد المقام ومش عاوز تاكل عيش وملح معانا ؟
شريف بص لامال اللى كانت لسه مش مستوعبه أن شريف عندها فى البيت ومش عارفه تقول ايه .
الام بصت لامال اللى كان باين عليها التوتر وقالت.. ما تقولى حاجه يا امال يرضيكى كده ينزل من غير ما ناكل مع بعض عيش وملح .
امال ابتسمت وردت وقالت .. لا طبعا يا امى خلى حضرتك مستريحه وانا هاروح اجهز السفرة على طول .
شريف بصلها وقال.. انا مش عاوز اتعبكم معايا يا جماعه انا جيت اطمن عليكى وهانزل على طول .
امال بصتله وقالت.. بدام ماما قالت كلمه مش هاقدر ازعلها .
وفعلا راحت امال ودخلت المطبخ ومكنتش مصدقه أن شريف عندهم فى فى البيت وقرصت نفسها علشان تفوق وتعرف أن ده فعلا حقيقى .
جهزت السفرة وحطت الاطباق وجهزت السلطه وخلت السفرة تفتح النفس وبعدها راحت علشان تناديهم .
مامتها كانت لسه مخلصه الاكل اللى كانت ريحته روعه وجميله وماليه المكان كله .
راحت امال وطلبت من شريف ومامتها أنهم يجوا علشان الاكل جاهز .
قام شريف وطلب أنه يغسل أيده قبل ما يقعد وياكل وآمال دخلته الحمام وبعدها راح السفرة وقعد الكل وبدؤا يكلوا .
شريف بصلهم وقال.. ما شاء الله يا حاجه الاكل حلو جدا تسلم اديكى.
الام … شكرا يا ابنى وبالهنا والشفا .
انا بقالى كتير ما وقفتش اعمل اكل بس علشان تعب امال وقفت النهارده وعملته ونصيبك انك تدوقه .
شريف بصلها وقال .. ربنا يديكى الصحه وفعلا الاكل حلو جدا .
امال كانت فى دنيا تانيه ومش عارفه تقول ايه ولا تتصرف ازاى وكانت مستغربه جدا أن شريف قاعد معاهم وكمان ايه على سفرة واحده وعندها فى البيت كمان.
وطول ما هى قاعده كانت سرحانه وعماله تقلب بالشوكه وخلاص فى الطبق اللى قدامها وده اللى خلى شريف ياخد باله منها .
خلصوا الاكل وقاموا قعدوا فى الانتريه كلهم وشويه الام قامت وقالت .. اروح انا بقى اجيب القهوة .. قهوتك ايه يا ابنى.
شريف بصلها وقال ..مضبوطه لو سمحتى .
الام .. ثوانى وهاتكون جاهزة يا ابنى ودخلت على المطبخ وسابت شريف وامال مع بعضهم .
شريف عيونه على عيون امال وابتسم وقال .. عامله ايه يا امال.
امال بكل خجل ردت وقالت .. الحمد لله يا شريف بيه .
شريف بغيظ بصلها وقال .. ممكن تقولى شريف بس لو سمحتى .
امال وشها احمر اوى ومعرفتش ترد عليه وبصت على الارض .
شريف بصلها وقال .. انتى ليه نزلتى من المستشفى ومصبرتيش علشان اوصلك للبيت ؟
امال اتنهدت وقالت.. يا شريف بيه احنا ناس فى منطقه شعبيه ووالدى متوفى الناس تقول ايه وانا راكبه معاك العربيه لوحدنا وكمان موصلنى لحد البيت .
شريف بصلها وقال .. عندك حق طبعا بس انا مش قصدى أنى احرجك مع حد انا كنت عاوز اوصلك علشان انتى تعبانه وانا السبب فى تعبك ده مش اكتر.
امال بصتله وقالت .. والناس اللى هاتشوفنا ما تعرفش كل ده يبقى ليه اجيب لنفسى الكلام واخلى حد يتكلم عليا .
شريف بكل اعجاب رد وقال .. كلامك صح وانا بعتذر أنى جيت من غير ميعاد بس ما كنتش اقدر انام الا لما اطمن عليكى .
امال اتكسفت اوى من كلامه ومن نظراته ليها ومعرفتش ترد عليه لولا أمها جت و دخلت بفنجان القهوة .
الام بصتله بكل حنيه وطيبه وقالت.. اتفضل يا ابنى القهوة.
شريف بصلها وقال .. تسلم اديكى يا حاجه تعبتك معايا.
الام ردت وقالت .. تعبك راحه يا ابنى.
شويه وشريف شرب قهوته والام استأذنت انها تقوم تصلى وشريف قام علشان يمشى بس قبل ما ينزل طلب من امال رقم تليفونها علشان يبقى يطمن عليها وبلغها أن ابوه اداها يومين اجازة علشان تستريح براحتها .
نزل شريف على طول وآمال خدت نفسها وكأنها كانت بتحلم .
فاقت على موبيلها بيرن وراحت علشان تشوف مين .
امال ردت وقالت.. السلام عليكم .
فاتن ردت وقالت .. وعليكم السلام ازيك يا امال عامله ايه يا حبيبتى دلوقتى.
امال ابتسمت وردت وقالت .. الحمد لله يا فاتن احسن والله .
فاتن .. معلش يا حبيبتى والله كان نفسى اجى معاكى المستشفى بس انتى عارفه علشان الشغل ومفيش غيرى انا وانتى .
امال … عارفه يا قلبى ولا يهمك وشكرا على سؤالك وفضلوا يتكلموا شويه .
وقفلت امال مع فاتن وراحت تشوف مامتها اللى فى أوضتها .
الام بصتلها وقالت .. الضيف مشى يا بنتى ؟
امال ردت وقالت .. اه يا امى نزل .
الام ردت وقالت .. ما شاء الله عليه شكله ابن حلال ومحترم ومؤدب وابن ناس كتر خيرهز.
وشكله كده مهتم بيكى.
امال ردت وقالت .. ده اتحول فجاه من ناحيتى يا ماما والله .
ده كان بيعاملنى وحش اوى ومش انا بس اى بنت بتشتغل فى الشركه بيعاملها وحش شكله مش بيحب البنات خالص .
الام ردت وقالت .. اكيد فيه سبب لكده علشان مايحبش البنات بس اللى انا شوفته بعينى واهتمامه بيكى حاجه تانيه .
امال…. انا برده بدأت احس الاحساس
ده وأنه مهتم بيا الايام دى .
ده حتى كمال بيه ربنا يكرمه بيعاملنى كويس اوى ودايما يقولى يا بنتى .
الام سرحت شويه و ردت بكل حزن وقالت .. ابوه اسمه كمال !!
امال ردت وقالت .. اه يا امى اسمه كمال مهران الشرقاوى.
صاحب اكبر مجموعه شركات فى الوطن العربى .
الام بصدمه بصتلها وقالت .. انتى بتقولى اسمه ايه ؟؟؟
امال بأستغراب بصت لامها وقالت .. فى ايه يا ماما انتى اتفاجئتى بالاسم كده ليه ؟
الام وشها ظهر عليه الاستغراب والذهول وقالت.. انتى متاكده يا امال من الاسم ده .
امال ردت وقالت .. اه طبعا يا امى انا شغاله معاهم بقالى اكتر من سنتين وعارفه اسمه كويس اوى .. فى ايه يا ماما انتى تعرفيه ولا ايه .
الام سكت شويه وعيونها اتملت بالدموع وبصت لامال وقالت .. اقعدى يا امال وانا هاحكيلك كل حاجه مقدرتش احكيهالك طول العمر ده كله وكنتى على طول تسألينى وانا اهرب من سؤالك انا وابوكى الله يرحمه .
وكنتى بتستغربى اوى من وانتى صغيرة اننا ملناش اهل ولا قرايب زى بقيت اصحابك .
انا هاحكيلك يا بنتى كل حاجه علشان تعرفيها قبل ما يجرالى حاجه واموت واسيبك فى الدنيا لوحدك .
امال ردت وقالت .. بعد الشر عليكى يا ماما ربنا يخليكى ليا وما اتحرمش منك ابدا.
الام بدأت تحكى وآمال كانت سمعاها .
فلاش باك!!!
الاب .. قولتلك مش هاتتجوزيه يعنى مش هاتتجوزيه يا جميله .
جميله .. يا بابا احنا بنحب بعض من زمان وهو هايشتغل وهايبنى نفسه وبكرة يبقى حاجه كبيرة .
الاب .. هى كلمه واحده مفيش غيرها ولو عملتى اللى فى دماغك لا انتى بنتى ولا اعرفك وهاتبرا منك خالص لحد ما اموت انتى فاهمه.
كمال اخوها بصلها وقال .. اسمعى كلام بابا يا جميله واوعى تسبينا احنا ملناش غير بعض .
بعد ماما الله يرحمها ما ماتت .
جميله بكل حزن بصت لكمال اخوها وقالت .. انت لسه صغير يا كمال وبكرة تعرف يعنى ايه تحب شخص وانك مش هاتقدر تستغنى عن اللى بتحبه ده طول عمرك .
كمال رد وقال .. واحنا بنحبك يا جميله وانا مليش غيرك بعد امى الله يرحمها ومش هاقدر استغنى عنك .
جميله خدته فى حضنها وفضلوا يعيطوا مع بعض هما الاتنين .
وبعدها كل واحد راح على اوضته علشان ينام .
صحى الاب الصبح ودور على جميله فى كل العزبه ملقهاش .
بااك!!
الام .. هى دى حكايتى يا امال سبت ابويا وسبت اخويا الوحيد واتجوزت ابوكى اللى كنت بحبه بس كانت ظروفه وحشه وفضلت وحشه لحد ما مات .
ولما خلفتك سميتك على اسم امى الله يرحمها امال .
امال ردت وقالت .. انا مش مصدقه كل اللى انتى قولتيه ده انا كأنى بحلم يا امى .
ليه ما قولتيش الحكايه دى من زمان انا اول مرة اسمعها منك وكنت على طول اقولك فين اهلك وفين اخواتك كنتى تردى وتقولى انا اهلى ماتوا كلهم فى حادثه وانا الوحيده اللى نجيت من الحادثه دى وماليش اهل خالص .
حتى بابا الله يرحمه كان كده مالوش غير اخ ومات وانا صغيرة .
الام بصتلها وقالتو ..ابوكى لما هربنا مع بعض كان عايش مع عمته هو واخوه بعد ما أمه وأبوه ماتوا وهى اللى ربتهم وعرفنا بعد كام شهر من هروبنا انها ماتت من زعلها على ابوكى ونزل البلد وهو متخفى وجاب اخوه الاصغر وعاش معانا شويه كنتى انتى صغيرة ساعتها ولانه كان صحته ضعيفه وعنده القلب مات وهو صغير .
وانا كنت عرفت برضه أن ابويا مات من زعله عليا وحاولت ادور على اخويا كمال بس ما لقتهوش وعرفت أنه باع العزبه وكل حاجه وساب البلد وده اللى كان تاعبنى وتاعب قلبى طول حياتى .
امال اترمت فى حضن امها وفضلوا يعيطوا هما الاتنين .
امال .. يعنى كمال بيه ده يبقى خالى وشريف ده بيكون ابن خالى
الام ردت وقالت .. لازم نتأكد الاول ومش هاتاكد غير لما اشوفه بعينى اودامى واعرف أنه كمال اخويا فعلا .
امال ردت وقالت .. يبقى لازم نروح على الشركه الصبح انا وانتى
