ورد

فى غرفة صفية

تدخل ورد لتجد صفية على حالها بأحضان والدتها لتجلس أمامها وتربت بيدها على وجنة صفية بحنان وهى تحاول لفت انتباهها لتنظر صفية إليها كالشاردة فتنتهز ورد الفرصة وتقول : تعرفى ياصفية …ساعات الواحد بيبقى عاوز يعمل حاجة أو يقول حاجة بس مابيبقاش عارف يبتدى منين أو ازاى ، واحيانا بنعمل حاجة واحنا مغصوبين عليها وكارهينها ونتفاجئ بعد كده أنها كانت كل الخير اللى حصل فى حياتنا

وساعات بنعمل حاجات مضطرين نعملها لأسباب من جوانا مابنطلعهاش لحد ، بس انا عاوزاكى تطلعيها ياصفية

لتنظر صفية إليها بعدم فهم قربتت ورد على يدها قائلة : اقوللك على حاجة ..بس قبل ماتردى ، لازم تعرفى أن ده لمصلحتك صدقينى

ثم تأخذ ورد نفسا عميقا وتقول : انتى اختارتى تطلقى من على ، وعارفة انك كنتى موجوعة وجع السنين يوم مااخدتى القرار ده ، يمكن أو اكيد كنتى بتتمنى حاجة معينة من جواكى وماحصلتش ، لكن اللى حاصل دلوقتى أن فى صفية واللى لازم تفكرى فيها لوحدها دلوقتى …صفية وبس ، اللى لازم تشوف حياتها ..سواء رجعتى لورا ، أو قررتى ترمى كل حاجة ورا ضهرك

على واقف برة ياصفية وعاوز يشوفك ، ولو عاوزة رأيى ماترفضيش تسمعيه، وياتسامحى ، ياتقفلى الصفحة وتقطيعها من حياتك خالص ..انتى لسه صغيرة وجميلة والف من يتمناكى حتى لو كان قلبك دلوقتى مش معاكى ، لكن مافيش حاجة بتفضل على حالها

لتومئ لها صفية برأسها علامة الموافقة ، لتساعدها مع حكمت لتعتدل بجلستها وتغسل لها وجهها ونتركها هى وحكمت ليسمحا لعلى بالدلوف اليها

……………………

وفى الخارج تسأل حكمت ورد بشئ من اللوم : ليه قويتيها عليه ياورد

ورد : صدقينى ياماما كده احسنلهم هم الاتنين ، صفية لو رجعت لعلى هتفضل طول عمرها موجوعة ، ومين قالك أن على هيفضل يعاملها كويس بعد مايخلف من غيرها ، أو أن اللى يتجوزها ماتعايرهاش وتحرق دمها كل دقيقة ، أو أن صفية نفسها تتوجع كل مانشوف خلفته فى حضنه

ليه تعيش حياتها محرومة من الخلفة طالما ممكن ربنا يرزقها …عشان بتحبه ؟! حبها ماجبلهاش غير الوجع

صفية لازم تطلع كل اللى جواها وواجعها عشان تفوق وتقدر تكمل حياتها

لكن صدقينى لو اختارت ترجعله هدعمها بكل قوتى ….المهم انها تبقى راضية عن قرارها ده