الحلقة السابعة
اتصلت نور على جوزها فردت عليها بنت
نور باستغراب: أنتِ مين؟
البنت في الموبايل: مراته يا حبيبتي أنتِ اللي مين؟
نور بصدمة: نعم؟؟؟؟
البنت بدلع: هو اللي نعم يا حبيبتي قولي أنتِ مين بسرعة عشان مش فاضيالك أصل جوزي حبيبي مصدع وعايز ياكل
نور بضيق في نفسها: بقى طلع متجوز قبلي كمان طب أقولها إني مراته ولا إيه؟ ممكن تكون ماتعرفش إنه متجوزني فقالت لها:أنا مريضة عنده وكنت عايزة أسأله عن نوع دوا وكدا
البنت: تمام لما ياكل هخليه يتصل عليكي ويقولك طول عمره دكتور طيب وكويس يلا سلام وقفلت معها
قعدت نور وهى مصدومة وبتكلم نفسها ليه اتجوزها طالما متجوز قبل كدا، طب معقول يكون متجوز من غير ما أهله يعرفوا لأن هو قالي إن خالي قاله عليا معقول ماكنش عايزين فاتجوز في الفترة دي، ولا كانوا عارفين بس جه يلم الموضوع
طب ليه يعمل فيا كدا، لما يجي نشوف الموضوع دا وأنا بردوا بقول ماله مش بيزعق ليا لما ماعملتش غدا ولا على باله ماشي يا أمان
بعد ساعة وصل أمان ونادى عليها
جت نور بضيق وقالت: كلت كويس وشبعت؟
أمان وهو بيخبط على بطنه: الحمد لله الأكل من إيدها لذيذ أوى يا نور
نور بعصبية: ومالك بتقولها بانشكاح كدا يا أخويا؟ العموم ما هى بردوا الأولى فلها مكانة خاصة عندك
أمان بابتسامة: أكيد يابنتي بس طبعا مارضيتش احلي عندها قولت أجي أحلي بالبسبوسة بتاعتك عايز أشوف عمايلك
نور بضيق: اها ومالو عايز تتطمن على مستقبلك واحدة تعمل أكل كويس وواحدة تعمل حلويات كويسة
أمان باستغراب من طريقتها وعصبيتها قال: في إيه يا نور مالك متعصبة كدا
نور بتحاول تهدى قالت: خلاص يا إدريس
أمان لاحظ إنها بتقوله يا إدريس لما تكون زعلانة منه، ولو فرحانة بتقوله يا أمان فقال: مالك يا نور زعلانة ليه أنا عملتلك حاجة؟
نور بضيق: لا دا حقك أنا اللي متدخلة وشخص تقيل في حياتكم
أمان باستغراب: يابنتي في إيه؟
بقلم إيسو إبراهيم
نور بتحاول تهدى: ليه اتجوزتني طالما أنت متجوز قبلي
أمان بصدمة: متجوز قبلك إيه؟
نور بهدوء: ماتكذبش عليا وتلف وتدور أنا اتصلت عليك ومراتك ردت عليا
أمان بخضة: مراتي مين؟
نور بعصبية: هو أنت بتسألني أنا؟ ولا يكونش أنا اللي متجوزاها؟
بص هى أصلا علاقتنا بدأت من الأول غلط أنت ماكنش لازم تعمل فيها الشخص الشهم الجدع اللي جاي يلم الموضوع
أمان بزهق: نور ماتتكلمنيش كدا قولي في إيه؟
نور حكتله المكالمة فضحك أمان بصوت عال وقال: وأنتِ صدقتي؟
نور باستغراب: وماصدقش ليه؟ يعني أنا ماعرفش حاجة عنك أصلا غير اسمك ووظيفتك ولسه عارفة إنك مابتاكلش السمك
أمان: دي أختي يا هبلة اللي من أمي طبعا أنا روحت أتغدا عندهم، وعشان ماما كانت بتغيظ فيها وبتهتم بيا فاضايقت وقالتلك كدا عشان تنكدي عليا وتاخد حقها
نور بصتله اللي هو دا بجد
أمان فهمها وقال: طب هتصلك دلوقتي عليها واسمعي بودنك
اتصل عليها وردت عليه بزهق وقالت: ها روحت لمراتك الغالية طب دا اسم تسميه على موبايلك يا بني الناس تسمي حاجات رمانسية وأنت الرومانسية عندك عندها تسلخات
بس عملت فيها مقلب إنما إيه وتقريبا صدقتني قولي بقى نكدت عليك صح؟
أمان بهدوء: حصل ياختي يلا سلام
قفل معها وبص لنور اللي مافهمش من تعبيرات وشها حاجة فقالت: طلقني لأننا مش مناسبين لحد
أمان بصدمة: أطلقك ليه؟ ما هو عرفتي مش متجوز عليكي ولا هو لعب عيال وخلاص
نور بهدوء: عشان مش واثقة فيك
أمان بصدمة أكتر: إيه؟
يا ترى فعلا هتتطلق ولا إيه؟
يتبع…
الحلقة الثامنة
قالت نور: طلقني لأننا مش مناسبين لبعض
أمان بصدمة: أطلقك ليه؟ ما هو عرفتي مش متجوز عليكي ولا هو لعب عيال وخلاص
نور بهدوء: عشان مش واثقة فيك
أمان بصدمة أكتر: إيه؟ ليه أنا عملت إيه عشان تقولي كدا طب أختي وعملت فيكي مقلب يعني مش حقيقي
نور بنفس الهدوء: احنا مانعرفش حاجة عن بعض، أنا ماعرفش شخصيتك هل كويس أو بتمثل عليا دا هل طيب ولا لأ، ياترى الأيام الجاية حياتي هتبقى معاك إزاي هتبقى مريحة ومستقرة ولا مشاكل دايما وزهق ونندم عاليوم دا يعني ماخدناش وقت نتعرف
أمان بهدوء مسك إيدها وقعدها وقال: كلامك صح بس خلينا نتفق على حاجة احنا دلوقتي فعلا يعتبر في فترة خطوبة بس من غير حدود ودي حاجة كويسة إننا نعرف بعض ولو مش مناسبين يبقى نطلق ومش هتفرق لو اطلقتي بعدين أهو في الأول والآخر اسمه طلاق يعني خلينا مع بعض لغاية ما نكتشف حقيقة بعض الحقيقية بدون تزيف
ولو شوفتي من شيء مايعجبكيش أو هيأثر على علاقتنا مع بعض يبقى نطلق ومانتعبش قلوب بعض، لكن لو كل واحد فينا شاف إننا مناسبين لبعض يبقى نبدأ حياة جديدة مع بعض تمام
وأهو كدا مش هتخسري حاجة
نور بتفكير: تمام موافقة
أمان ببسمة: عايز بقى أدوق البسبوسة يارب تكون حلوة
نور بابتسامة: حاضر ثواني وأكون عندك
دخلت المطبخ وبتحطله قطعة في طبق لقته دخل وراها وقال: تسلم إيدك هاتي بقى أشوف
أكل منها وقال بصدق: جميلة زي اللي عملتها ومسك إيدها وقال: تحفة
نور اتكسفت وقالت: شكرا
بصلها أمان وقال بسخرية: شكرا هو أنا بعزم عليكي بشاي؟!
اطلعي ياختي خليني أغسل الأطباق دي اللي مهبدلاها
نور بسرعة: لا أنا هغسلهم
أمان بهدوء: الحياة مشاركة يا نور يعني أنتِ طبختي أنا أغسل كدا يعني وبعدين أنا متعود أصلا على كدا فمش جديد عليا وماتخافيش هروق المطبخ
نور بابتسامة: ماشي هطلع أشوف حاجة برا أعملها
فات أسبوع وفعلا مديين نفسهم فرصة يتعرفوا على بعض ويفهموا بعض
بقلم إيسو إبراهيم
نور طلعتله وقالت: بقولك يا أمان
أمان: قولي
نور: بتحب الكريب ولا البيتزا؟
أمان بسرعة: الإتنين
نور: طب اطلب بقى الإتنين ليا وليك
أمان بسخرية: اممم قولي كدا ياختي شايفك خدتي عليا أوي يا عسل
نور بزعل: ودا مضايقك يعني؟
أمان بابتسامة: بالعكس مفرحني أوي ودا اللي بتمناه
نور بابتسامة: طب يلا بقى عشان جوعانة
أمان بابتسامة: حاضر، وطلب لهم
فات ثلاث شهور كمان وتقبلوا بعض وكل واحد شايف إن دا الشخص المناسب له
أمان بحب: بقولك يارب نور قلبي عايز أعمل بارتي صغيرة كدا هنعزم قرايبنا يعني بدل ما احنا ماعملناش فرح
نور بفرحة: تمام فكرة حلوة وموافقة
وبالفعل أمان اتفق مع الناس وجهزوا لحفلة بدل الفرح وقرايبهم وصحابهم المقربين اللي حضروا، ونور كانت لابسة فستان أبيض بسيط وخمار أبيض وفوقه تاج
أمان مسك إيدها وقال: حلوة زي كل يوم يا حبيبتي
نور بحب: تسلملي، وكمان شكلك يجنن في البدلة أول مرة أشوفها عليك
أمان: دا جمال عيونك اللي شايفاني كدا
نور بسعادة: أنت فعلا اسم على مسمى يا أمان، بحس بأكتر حاجة كنت بتمناها دايما مع شريك حياتي وهى الأمان، ونهتم ببعض وبأصغر التفاصيل ويعاملني بحنية حتى لو حصل ما بينا مشكلة نحلها بالعقل ويكون متفاهم وعنده إنسانية ودا اللي لقيته فيك.
أمان بابتسامة وفرحة: عمري ما هخذلك يا نور قلبي
نور بابتسامة: ودا اللي متأكدة منه بل أمان قلبي، أحسنت الظن بالله وكنت واثقة إنه هيعوضني.
كانوا بيسلموا على الموجودين وكل واحد فرحان لهم وبيتمنوا لهم السعادة
خلصت الحفلة ووالدتها سلمت عليها وخالها، وخدها ومشي ولكن على بيت جديد لحياة جديدة
بالغ في حسن ظنك بالله ..
فإن جزاء حسن الظن أن تنال ما ظننت..♥
تمت
