الفصل الخامس
«يا كُل كُلي»
بقلم روز أمين
جحظت عينيه وعلى الفور حول بصره إلى تلك المبتسمة ليسألها بارتيابٍ ظهر بعينيه:
-الكلام اللي بيقوله ذكريا ده حقيقي يا جنة؟!
رمقته بنظرة ساخرة ليجيبهُ هو بدلاً عنها:
-وهو الكلام ده فيه هزار يا حضرة الظابط؟
بعينين مشتعلتين هتف الأخر بحدة:
-أنا بسألها هي ما وجهتلكش كلام علشان تجاوبني.
قطع حديثهما اقتراب والدة ذكريا حيث أتت من الطاولة التي تجلس عليها لتتحدث إلى محمود بابتسامة هادئة:
– إزيك يا محمود
أجابها بنبرة خرجت حادة لم يستطع السيطرة عليها:
-الله يسلمك يا طنط
ثم سألت ولدها بعدما حاوطت ظهره بذراعها بحنان:
-واقف كدة ليه يا حضرة الظابط
لتستطرد وهي تنظر على جنة وصديقتيها بعدما رأت نظرات نجلها السعيدة:
-مش هتعرفني بالقمرات يا ذكريا
تحدث بحبورٍ وهو يتطلع على جنة مشيرًا بكف يده عليها:
-دي جنة بنت الحاج محمد الأنصاري اللي كلمتك عنها يا ماما
ارتسمت ابتسامة واسعة فوق ثغرها لتتجه على عُجالة صوب جلوسها وعلى الفور وقفت جنة لاستقبالها لتتحدث المرأة بانبهارٍ:
-ماشاء الله، ده أنتِ طلعتي زي القمر يا جنة،بالظبط زي ما وصفك ذكريا
ابتسمت جنة وتحدثت شاكرة:
-متشكرة يا طنط
اقتربت عليها المرأة وتحدثت وهي تحتضنها لتقوم بتقبيل وجنتيها:
-تعالي في حضني لما أبوسك، وإن شاءالله هزوركم في البيت أنا وذكريا قريب
كان يستمع إلى الجميع بذهولٍ وعينين متسعتين جراء عدم تصديق ما يدور أمامه، استفاق على صوت والدته الذي صدح من خلفه ناطقتًا باسمه ، نظر إليها بعينين تستشيطُ غضبًا وتحدث باقتضاب:
-جاي يا ماما
ثم تحدث وهو يرمق جنة بنظراتٍ توعدية قبل ان يتحرك رُغمًا عنه:
-بعد إذنكم
تحرك إلى طاولة والدته تحت اشتعال صدر تلك العاشقة ليتحدث بوجهٍ قاتم إلى والدته:
-فيه إيه يا ماما،عمالة تندهي ليه؟
أجابته بضيق مشيرة بكفها إلى سارة:
-بنده لك علشان تقعد مع خطيبتك يا محمود
جلس على مضض ثم حول نظره إلى جنة ليتابع ما يحدث تحت غضب سارة من تجاهله لشخصها،كان يشعر بروحه تحترق وهو يرى تلك السيدة الغليظة تحتوى جنة بذراعها وكأنها أصبحت خطيبة نجلها بالفعل مما جعل تنفسهُ يزداد مع إحتدام نظراته الموجهة إلى ذاك الغليظ المسمى بذكريا، زفرت سارة بضيق بعدما شاهدته ينظر بتركيز على صديقه وتلك الفتاة التي لم يبعد بناظريه عن وجهها، لاحظت عفاف عبوس وجه سارة مما اغضبها فنظرت لنجلها وتحدثت بلهجة حادة:
-قوم أقعد مع بابا واخواتك على التربيزة بتاعتهم يا حضرة الظابط
حول بصره إليها وهتف بنبرة رخمة:
-أنا مرتاح هنا يا ماما
واستطرد بحديثٍ ذات مغزى وهو ينظر إلى سارة:
-ولا ده كمان بالغصب؟
ضيقت سارة عينيها متعجبة حديث محمود الذي وما أن انتهى من جملته حتى عاد ببصره مرةً أخرى يتطلع على جنة،تنهد براحة حين وجد ذاك اللزج قد اصطحب والدته وعادا لطاولتهما،أتت أيضاً منى زوجة أخيه وجلست بالمقعد المجاور له فهمس لها مستفهمًا بنبرة حادة:
-اللي اسمه ذكريا اتقدم فعلاً لجنة يا منى؟
تنهدت قبل أن تنظر إليه لتجيبه بأسى:
-أيوة يا محمود
سألها بضيق:
-والهانم بقى رأيها إيه؟
لسة بتفكر…نطقت بها قبل أن يهتف ذاك الحانق بعينين تطلق شزراً:
-تبقى ناوية علي موتها وموت الحيوان ده قبل منها
نظرت إليه بذعرٍ فالتفت هو بعينين مشتعلتين على تلك التي وقفت لتتجه بطريقها إلى خارج القاعة بعد أن أتاها اتصال هاتفي من شقيقتها وخرجت لتجيبها، نهض وعلى عجالة تحرك خلفها مما ازعج عفاف وأثار فضول سارة، وقف خلفها صامتاً لحين انتهائها من الاتصال حيث كانت ليلى تطمأن عليها وتسألها متى سينتهي حفل الزفاف لكي تبعث لها بزوجها ليصطحبها إلي منزلهما، ابلغتها أن الحفل سينتهي بعد حوالي الساعة وما أن انتهت واستدارت لتعود لداخل الحفل حتي كادت أن تصتدم به لولا رجوعها للخلف سريعًا لتتحول ملامحها إلى غاضبة وهي تهتف قائلة:
-مش تحاسب يا أخينا
ضيق بين عينيه قبل أن يسألها متعجبًا:
-أخينا؟! هي وصلت لكدة؟
اخذ نفسًا عاليًا ليهدئ من روعه قبل أن يتحدث بنبرة حادة:
-ما علينا يا جنة، خلينا الوقت في المهم
واستطرد بعينين يتطاير منهما الغضب:
-الزفت اللي اسمه ذكريا اتقدم لك بجد
وقبل أن تُجيبه وجد صوت من يصدح من خلفه ليجيبه بتعالي:
-هو أنتَ يا ابني الفهم عندك بقى بطئ ولا إيه، إنتَ مش لسة من شوية سائلها نفس السؤال ده وجاوبناك أنا وهي جوة
استدار ليجابهه قبل أن ينطق متعديًا باللفظ:
-وإنتَ مال امك يا سمج
أمسكهُ ذكريا من ذراعه ثم تحدث بنبرة غاضبة:
-إنتَ بتكلمني أنا بالطريقة دي يا حقير؟
امسك كفه وبات يفركهُ بعُنفٍ بقبضته ليتحدث بحنقٍ:
-أيوة يا روح أمك بكلمك إنتَ، وكلمة زيادة قسماً بربي لامرمط بكرامتك الأرض واخليك فرجة للناس الموجودة دي كلها
ارتعب داخلها وتحدثت بنبرة توسلية بعدما وجدتهما قد تشابكا بالايدي استعدادًا لتسديد كلً منها الضرب للأخر:
-أرجوكم تبعدوا عن بعض، أنا مش عاوزة فضايح
إدخلي إنتِ جوة يا حبيبتي لحد ما أعلمه الأدب وادخل لك…كلمات نطق بها ذكريا أثارت جنون ذاك العاشق ودفعهُ لتسديد لكمة قوية له بعدما غلت الدماء بعروقه بعدما استمع غريمه وهو ينسب حبيبته له ليهتف بسخطٍ:
-حبيبة مين يا سخيف يا عديم الرجولة
ترنح ذكريا على أثر اللكمة وقبل أن يقوم بردها له اسرع عليهم أحمد وعلاء وسامح بعدما تحركوا خلفهم فور مشاهدتهم لخروج ذكريا وتلتهم عفاف التي كانت تراقب الوضع عن كثب،تحرك سامح لابعاد محمود في حين قاما علاء واحمد بسحب ذكريا للخلف ليهتف بغضبٍ عارم وهو يحاول التملص ليهجم علي ذاك الواقف بثباتٍ أمام تلك المرتعبة والتي تضع كفها فوق فاهها وجسدها بالكامل ينتفضُ هلعاً:
-سيبوني عليه علشان أعرفه مقامه ابن الكلب ده
تحرك محمود متوجهاً صوبه استعدادًا للهجوم عليه وتسديد المزيد له من اللكمات وذلك بعدما استمع لسباب والده باذنيه لتسرع اليه عفاف وتقف امامه لتمنعه من المرور قائلة:
-خلاص يا محمود، كفيانا فضايح
ونظرت الي ذكريا لتهتف معنفتًا إياه:
-وإنتَ، تشكر يا ابن الاصول على سبك للراجل اللي ياما كلت عيش وملح في بيته أيام ماكنت في الثانوية
رد على حديثها بنبرة إلى حدٍ ما هادئة:
-هو إنتِ يا خالتي مشفتيش كلمني إزاي، ولا هتعملي زيه وتبصي للناس على إنهم أقل منكم؟
أجابته بقوة:
-الله يسامحك يا ذكريا، أنا عمري ما بصيت لحد على إنه أقل مني ، بس كنت متعشمه تركن زعلك مع صاحبك على جنب ومتغلطتش في راجل زي أبوك
جذب احمد وعلاء ذكريا وخرجا به إلى خارج القاعة وحاولا السيطرة على غضبه وبالاخير نجحا،أما تلك المرتعبة التي حاولت التماسك بعد فض الاشتباك الذى حدث بسببها، تنفست ثم خطت بساقيها المرتعشتان لتتحرك باتجاه باب القاعة لولا ذاك الذي جذبها من رسغها بحركة مباغتة جعلتها تجحظ عينيها لتهتف بصوتٍ غاضب وهي تجذب رسغها بقوة:
-سيب إيدي
هتف بنبرة اعنف من نبرتها:
-لازم نتكلم
مفيش بينا كلام علشان يتقال… هكذا جابهتهُ بحديثها ليهتف بغضبٍ عارم:
-لا فيه يا جنة، وريحي نفسك علشان مش هتتحركي من هنا غير لما نتكلم وتسمعي الكلام اللي أنا عايز أقوله
اسرعت عفاف إليه بعدما رأت غضب وهلع جنة بيِن بعينيها لتجذب يد إبنها الممسكة بخاصة جنة وهي تهتف غاضبة:
-سيب إيدها خليها تمشي
لتستكمل ناهرة إياه بعدما شدد من قبضة يده على رسغها بحركة تملكية:
-إنتَ إتجننت؟!
رمقها بنظرة غاضبة ليصيح بحِدة:
-من فضلك يا امي، مش هسمح لمخلوق يتدخل ويبعدني عن جنة تاني، كفاية بقى لحد كدة، كفااااية
من فضلك سيبني أمشي…جُملة نطقتها بدموعها الحارة لينظر داخل عينيها ويتحدث:
-مش هسيبك يا جنة، انا خلاص، يا قاتل يا مقتول في موضوعنا النهاردة
شهقت عفاف بارتعاب قبل أن ينظر إليها ويطالبها بالمغادرة، تنهدت واتجهت للداخل تاركة لهما المجال بعدما تيقنت من إصرار نجلها، نظر لعينيها وسألها مجددًا والغيرة تنهشُ داخله:
-قولي لي الحقيقة وريحي قلبي يا جنة
اتسعت عينيها وبغضبٍ شديد هتفت:
-يا بجاحتك يا اخي، بقى بتطلب مني أريح قلبك وإنتَ دمرت لي حياتي كلها،طب إديني سبب واحد يخليني أعمل فيك معروف واريح لك قلبك زي ما بتقول
تطلع إليها بعينين طالبة الرحمة فهتفت بحقدٍ من بين اسنانها:
-يارب ماتشوف الراحة ولا تدوق للسعادة طعم طول حياتك
كانت تتحدث بوجعٍ ينم عن مدى تألم روحها الذي بات يسكنها ليتحدث بنبرة توسلية:
-ارجوكِ إرحميني
هتفت بغضبٍ عارم لو أُطلق لهُ العنان لحرق الأخضر واليابس:
-وإنتَ ليه مارحمتنيش لما سبتني وخليت بوعدك ليا وروحت خطبت، عاوز تعيش حياتك وتتجوز وتخلف من واحدة غيري وجاي بكل جبروت تطلب مني أدفن نفسي بالحيا؟!
تألم لوجعها لتتعمق بالنظر لمقلتيه وتحدثت بملامة بنبرة أظهرت كم وجعها:
-رضيتها عليا إزاي يا اللي كنت بتقولي إن اليوم اللي يعدي عليا من غير ماشوف عنيكي أو أسمع صوتك مبيتحسبش من سنين عمري؟
رمقته بازدراء لتهتف حانقة:
-طلعت كذاب وانا طلعت مغفلة كبيرة علشان صدقت واحد جبان ومعندوش ضمير زيك
إسكتي شوية وحاولي تفهميني…نطقها بحدة لتهتف بنبرة عنيفة:
-هفهم إيه أكتر من اللي فهمته، هربت وروحت خطبت وسبتني اواجه نار أبويا وإخواتي لوحدي
إنتَ خنت العهد اللي كان بينا والخيانة ملهاش عندي مبرر،
قالت كلماتها بحِدة وقوة وتهيأت لتتحرك صوب الداخل باغتها بجذبه لذراعها ليهتف بحدة:
-إفهمي،انا كُنت مجبور على الخطوبة دي
ومين بقى اللي جبرك يا حضرة الظابط المحترم… جملة نطقت بها وهي ترمقهُ بسخرية ليتحدث بألم ظهر بَيِن داخل مقلتيه:
-الحاج محمد الأنصاري هو اللي اجبرني
قضبت جبينها لتغمغم بصوتٍ مضطرب:
-بابا!
واستطردت ساخرة:
-وهو بابا هيجبرك إزاي وليه إن شاءالله!
تنهد بأسى وتحدث:
-انا روحت لعمي محمد الأرض بتاعتكم وطلبت إيدك منه،ولما قالي إنه رفض وبعت لابويا الرد إترجيته وقولتله إننا بنحب بعض وانه برفضه ده بيظلمنا، علي أخوكِ مسك فيا وكان عاوز يضربني لولا بباكي إتدخل وشده بعيد عني،وبعدها طردني
أخذ نفسًا عميقًا ثم استرسل بنبرة استسلامية لرجُل يشعر بالإنكسار:
-عمي محمد إتصل بأبويا وهدده، قاله لو إبنك مبعدش عن بنتي وخطب الإسبوع ده هو ميضمنش رد فعل أخوكِ علي،وطبعاً أبويا اترعب من تهديد ابوكِ الصريح وعرض عليا اخطب ولما رفضت قعد يبكت فيا وقالي إني ناوي افتح بحور دم في البلد،وقالي لو مخطبتش في خلال الإسبوع ده اسيب البلد وأمشي وإنه هيتبرى مني وهيوصي إخواتي حتى جنازته ممشيش فيها،وافقت علشان أهدي ابويا من ناحيتي، واطمن خوفه عليا، أمي هي اللي خطبت لي سارة مش أنا
نظر لها وجد ملامحها قد لانت فتيقن قبولها لاعذاره لينتهز الفرصة ويقترب منها قائلاً بصوتٍ يملوهُ الوله:
-أنا عمري مااتخليت عنك يا جنة، طيفك ماغبش لحظة واحدة عن خيالي،ولا عمري فكرت إني ممكن اتجوز واحدة غيرك
نطقها بهيام ليسترسل بنارٍ شاعلة متحولاً:
-ولو مخلوق قرب منك هقتله
إبتسامة مُرة ارتسمت فوق ثغرها ليتحدث مؤازرًا إياها:
-متخافيش، مش هتكوني لحد غيري
ودي هتعملها إزاي يا محمود… نطقتها بضعفٍ ليهتف بنبرة حماسية:
-أخيراً سمعت إسمي من بين شفايفك تاني يا جنتي،
أبتسمت بوهن ليطمأنها هو بسعادة:
-ماتقلقيش يا حبيبتي، أنا هتصرف
سألته متأملة:
-هتعمل إيه؟
بعينين هائمتين أجابها:
-ههد الدُنيا علشان عنيكِ
انزلت بصرها أسفل قدميها بخجلٍ فتحدث بهيامٍ:
-وحشتيني يا جنة، كل حاجة فيكِ وحشتني، إشتقت لكلامنا طول الليل،حكاوينا اللي مبتخلصش وصوت ضحكتنا اللي طالعة من قلوبنا
كانت تنظر إليه بعينين مبهورتين بطلتهِ الساحرة وعينيه الهائمة بعشقها،حدثها بابتسامة وهو يناولها هاتفهُ الجوال:
-سيفي لي رقمك الجديد، وأول ما تروحي عند ليلى وتكوني لوحدك رني عليا علشان هنقضي سهرتنا مع بعض الليلة
سألته بابتسامة:
-وإنتَ عرفت منين إني هبات عند ليلى النهاردة؟
بابتسامة مشرقة وعينين لامعتين بحبورٍ أجابها:
-عيب عليكِ يا قلبي، أنا حفظت طبع عمي محمد وحافظ طريقة تفكيره من كلامك عنه، مستحيل هيسيبك تسافري من القاهرة للغربية بالليل كدة لوحدك
بابتسامة سعيدة تحدثت:
-لسة فاكر
عمري مانسيت أي حاجة تخصك يا حبيبتي،قريب قوي هتكوني ليا وهكون ليكِ…نطقها باشتياق وتمنى لتتنهد هي بأسى وتسألهُ وكأنها للتو تذكرت:
-وبالنسبة للاستاذة اللي سيادتك خاطبها، هتعمل إيه في موضوعها؟
هوصلها بيتهم بعد الفرح واتكلم معاها في الموضوع وانهيه…وكأن بجملته تلك قد اشعل نار الغيرة بقلبها رمقته بعينين مشتعلتين لتهتف:
-وتوصلها ليه إن شاءالله، وتتكلم معاها هي ليه أصلاً، مش المفروض تكلم بباها وتنهي معاه الموضوع؟
أجابها ليطمأنها:
-ممكن تهدي شوية، لعلمك، سارة فاهمة كويس طبيعة علاقتنا وإننا مخطوبين خطوبة صالونات،وعمرها ما استنت مني لحظات رومانسية زي اللي بين أي اتنين مخطوبين
لا ملكش حق، كنت عيشها وعيش معاها لحظات رومانسية علشان تبقوا تفتكروها بعدين…نطقت بها بنبرة حادة جعلته يبتسم من شدة حبوره ليتحدث بنبرة حنون:
-الحب والرومانسية ملهمش عندي غير وجهة واحدة بس، وهي وجهتك يا عمري
تبسم وجهها وتلونت وجنتيها باللون الوردي لتتحدث بعدما تحمحمت:
-انا هدخل علشان اقعد مع البنات شوية قبل ما أحمد جوز ليلى ييجي ياخدني
ووافقها ثم ولجت للداخل وبعد قليل لحق بها وظل ينظر إليها طيلة الحفل حتى أتى زوج شقيقتها واصطحبها بسيارته الخاصة إلى منزله بعدما صافحت صديقاتها واعتذرت من صديقتها العروس
بعد إنتهاء حفل الزفاف أخذ محمود سارة وتحرك بها ليوصلها إلى منزلها
صف سيارته جانبًا وتحدث بنبرة جادة:
-سارة،فيه موضوع مهم لازم أكلمك فيه
نظرت إليه بتمعن فاسترسل بعينين معتذرتين:
-أنا أسف، أنا مش هقدر أكمل معاكى،إنتِ تستاهلي واحد احسن مني بكتير،حد يقدرك ويحبك من قلبه،لكن أنا مش قادر أكون لك الحد ده
نظرت عليه ثم تحدثت…
يتبع.«يا كُل كُلي»
بقلمي روز أمين
🔹الفصل السادس🔹
نظرت إليه لتتنفس براحة وكأنها كانت تنتظر حديثهُ،إبتسمت وتحدثت باطمئنان:
-من يوم خطوبتنا وأنا كنت حاسة إن فى واحدة تانية فى حياتك، أنا مش غبية يا محمود، برودة إيدك وإنت بتلبسني الدبلة ونظرة عيونك المطفية أكدوا لي شكوكي، والنهاردة في الفرح إتأكدت لما شفت غيرتك ونظراتك وإنتَ بتبص عليها
ثم استرسلت متسائلة بفطانة:
-مش هي بردوا البنت اللي كانت قاعدة على التربيزة اللي قصادنا؟
اومأ بخفة لتنفس هي ثم استكملت:
-وانا مش هكذب عليك وهصارحك بالحقيقة، أنا واشرف إبن خالتي بنحب بعض جداً وهو إتقدم لي من فترة،لكن بابا الله يسامحة رفض بحجة إنه عاوز يجوزني لظابط شرطة من شدة حُبه لمجال شغله، بعدها إنتَ إتقدمت لي وحصلت الخطوبة، بس أنا كمان مقدرتش أحبك ولا أنسى اشرف، وبصراحة إنتَ ريحتني جداً بكلامك ده وادتني أمل إن بابا يوافق علي أشرف لما يتقدم لي تاني
شعورًا هائلاً بالراحة قد إحتاح روحه ليبتسم ويتحدث:
-ربنا يوفقك يا سارة، وان شاء الله سيادة اللواء يتفهم ويوافق على خطوبتك لإبن خالتك
عاد محمود إلى محافظة الغربية وفي اليوم التالي ذهب إلى منزل والد جنة فى المنزل وجلس بحضرته ووالدة جنة التي اصرت على الجلوس بغرفة الضيافة معهما لمساندت ذاك الشاب بعدما ترجتها جنة،ظل يقنعه بشتى الطرق متحدثًا:
-أنا جيت لحضرتك تاني بعد ما فسخت خطوبتي من البنت اللي بابا أجبرني على خطوبتها بسبب تهديدك
تنهد محمد ليهتف الاخر بترجي:
-ارجوك ياعمى حاول تفهمني، انا بحب بنت حضرتك ولو ماتجوزتهاش عمرى ماهتجوز،كدة إنتَ بتحكم عليا اعيش حياتي وحيد،والله ياعمى مستعد ارضيك بكل الطرق، قولي بس ايه اللى يرضيك وانا هعمله؟
تنهدت سامية متأثرة بنبراته الصادقة بحديثه ليتحدث محمد بأسى:
-يا ابني بلاش تصعبها عليا،انا كمان مفيش في إيدي حاجة أعملهالك،الموضوع اكبر مني ومنك
تحدث متلهفًا:
-أنا مستعد أبوس إيدك قدام البلد كلها لو ده هيرضيك ويصلح اللي حصل زمان،بس بلاش تحرمنى من الإنسانه الوحيدة اللي قلبي دق لها
تأثر محمد بمشاعره وتأكد من عشقه لابنته وبأن إبنته ستكون بأمان وسيفعل كل ما بجهده لاسعادها،استغل محمود مشاعر محمد المتذبذبة ليتحدث بوعدٍ صادق:
-والله العظيم هحطها في عنيا، عمري ما هزعلها في يوم ولا هخليك تندم إنك وافقت تجوزهالي
نظرت إليه سامية تترجاه بعينيها بأن يمنح قلب ذاك العاشق وقلب ابنتها فرصة للحياة، يعلم جيدًا عشق ابنته لذاك الوسيم وهذا وراء رفضها الدائم لاي شاب يتقدم لخطبتها، تنهد ثم تحدث بهدوء وتخبط داخلي:
-ادينى اسبوع يا ابني وانا هبقي أرد عليك، سيب لى بس رقم تليفونك وانا هكلمك
وكأن كلماتهِ أحيت روحه من جديد بعدما كانت تحتضر،تفوه متلهفًا:
– أنا هاجى لحضرتك تانى ياعمى علشان أعرف رأيك
أجابهُ بهدوء:
-ملوش لازمة تيجي، أنا هبقى أبلغك برأيى فى التلفون
وقف محمود ثم وجه الشكر الجزيل إلى محمد وتحرك بجانب سامية التي رافقته للخارج، وأثناء مرورهُ بردهة المنزل وجد تلك الجميلة تخرج من إحدى الغُرف لتلتقي الأعيُن وتسرح في سماء عشقهما،إنتفض جسدها ورعشة لذيذة أصابتها ليرتبك داخلها، تحمحم وتخطى وقوفها سريعًا إحترامًا لحُرمة المنزل وظل بطريقه حتى وصل لباب المنزل الخارجي ليلتف ناظرًا إلى سامية ثم تحدث باحترام مصافحًا إياها:
-بعد إذنك يا خالتي، ومتشكر قوي لوقفتك معايا
شرفت يا حضرة الظابط…قالتها بابتسامة عذبة لينصرف وقد تسلل الأمل داخل قلبه لينعش روحه من جديد،بالكاد تحرك خطوتان ليجد علي بوجهه،توقف ثم رمقهُ بنظرة حادة ليتخطاه الأخر قاصدًا طريقهُ كي يقطع عليه فرصة الشجار المحتم إذا تحدثا، إلتف ينظر عليه باستغراب لثواني ثم انطلق للداخل بعد أن ضغط على حاله لأقصى درجة كي لا يجذبهُ من تلابيب حلته ويُكيل له الكثير من الضربات كي يريح قلبه،ازداد حنقه عندما وجد والدتهُ تقف بمقابل شقيقته المتبسمة بسعادة، انطلق بسرعة الريح ليجذبها من ذراعها ويهزها معنفًا إياها بالحديث:
-الواد ده كان بيعمل إيه هنا، إنطقي؟
سيب أختك يا علي… نطقتها سامية بحدة ليهتف الأخر حانقًا:
-مش هسيبها غير لما اعرف الزفت ده كان بيعمل ايه في بيتنا؟
كانت ترتعب بين يداي ذاك الغاضب الذي تركها سريعًا بعدما استمع لصوت والده مصيحاً باسمه، ولج إلى حجرة الضيافة وجد والده يتوسط الأريكة بجلوسه، أشار له ليجاورهُ ليستجيب الأخر ثم سألهُ باحترام:
-إبن عبدالله التهامي كان بيعمل ايه هنا يا حاج؟
اخرج والده زفرة قوية توحي لمدى تشتت روحهُ ثم نظر إليه ليتحدث بهدوء:
-جاي يطلب إيد أختك
انتهى من جملتهُ ليهتف الأخر بحدة:
-تاااني، هو الواد ده معندوش دم، هو مش جه قبل كدة واترفض مرتين
ليستطرد بشرٍ ظهر بعيناه:
-شكله كدة مبيجيش بالذوق، اللي زيه محتاج علقة محترمة تفوقه
علي، إهدي واسمع كلامي للأخر وبطل عصبيتك اللي مودياك في داهية دي… هكذا تحدث والدهُ بحدة ليسترسل بنبرة أهدى:
-الولد عاوز أختك وباين من إصراره إنه شاريها بجد
اتسعت عينان علي ليتساءل بارتياب:
-كلامك ده ملوش عندي غير معنى واحد يا حاج، وهو إنك موافق!
ولجت سامية من الباب لتنضم إليهما وتجاورهما الجلوس،تنهد الأب وتحدث بنبرة هادئة:
-أنا فعلاً بدأت أفكر في الموضوع، ولا أنتَ عاجبك حال أختك اللي عمالة ترفض في العرسان، ولا شكلها اللي بقى مطفي زي ما يكون ميت لها عزيز، من الأخر يا ابني جنة عاوزة الولد ومش هتوافق بحد تاني حتى لو كان مين
هتف بعصبية:
-تتقطم رقبتها يا حاج، هنجوزها لذكريا غصب عنها، مش على أخر الزمن حتة بت هتمشينا على مزاجها؟
إوعى تتكلم كدة على أختك تاني… هكذا هتفت والدتها ليتحدث هو مبررًا:
-يعني إنتِ عاجبك الدلع الماسخ بتاعها ده يا ماما، من امتى البنات بتختار بنفسها اللي هتتجوزه
بدفاعٍ عن إبنتها تحدثت بنبرة جادة:
-ده حقها اللي الدين حللهولها يا ابني
لتسترسل بتبكيت:
-إنتَ ناسي مراتك عملت إيه علشان تخلي امها توافق عليك بعد ما كانت مقرية فاتحتها على ابن خالتها، وقفت قدام اهلها واجبرتهم يوافقوا عليك
دي غير دي يا ماما، أنا ومراتي مكانش بينا تار ودم… كان هذا مبرره ليتحدث أبيه مبرراً:
-ما هو أنا علشان الموضوع ده بالذات أنا بدأت أفكر تاني في طلب ابن عبدالله التهامي
هتف الشاب معترضًا برعونة:
-أبوس إيدك بلاش يا حاج، الموضوع ده لو تم هنتذل ونصغر في عيون الناس
تحدث ابيه برزانة:
-فين الذُل في كدة يا ابنى، الناس جاية ومادة لنا اديها بالخير وشاريين نسبنا، إيه المانع إن احنا كمان نمد لهم ادينا ونمحي الموضوع ونفتح صفحة جديدة مع بعض
وجد التذمر بعيناي صغيره فاسترسل كاشفًا عما يؤرقه:
-يا ابني أنا راجل كبرت في السِن وعاوز ارتاح واموت وانا مطمن عليك إنتَ واخواتك
بعد الشر عليك يا حاج…نطقتها ماجدة فتحدث علي متسائلاً بجدية:
-طب واعمامي،تفتكر هيوافقوا بالنسب ده؟
تنهد الأب وتحدث بحكمة:
-إعمامك سيبهم عليا أنا هعرف أتفاهم معاهم،ومتنساش إن اعمامك خايفين على ولادهم زي ما أنا خايف عليكم ويمكن اكتر
تعمق بالنظر إلى نجله ليسترسل بتذكيرٍ:
-إنتَ ناسي اللي عمله سامي إبن عمك السنة اللي فاتت، لما حاول يتربص لإبن عطية التُهامي وهو راجع من شغله بالليل، ولولا ستر ربنا اللي خلى عزت اخوه يسمعه وهو بيتفق مع ياسر إبن عمك أمين وجه قال لي ولحقتهم قبل ما يطلعوا يستنوه محدش عارف الحكاية كانت هتوصل لإيه
تنهد علي باستسلام وذلك لصحة حديث والده وفضل الصمت،اتجه محمد إلى الحمام توضأ ثم قام بتأدية صلاة الإستخارة وطلب العون من الله ثم توجه للنوم مباشرةً، باليوم التالي جمع محمد أشقاءهُ وجميع رجال العائلة وشبابهم وتحدث إليهم بالموضوع، بالبداية اعترض البعض وخصوصًا أن منهم من كان يريدها زوجةً لنفسه وبالفعل قد تقدم الكثير منهم لخطبتها وقُوبل الطلب بالرفض كالعادة، بالنهاية وافق جميع العائلة على رأي محمد وأيدوه لكي ينتهوا من ذاك الثأر اللعين ويغلقوا ذاك الباب للأبد
بعد مرور أربعة أيام منذ زيارة محمود لمنزل محمد الأنصاري، كان يعمل داخل مكتبه الخاص بعمله كضابط شرطة، اتاه اتصال فرفع هاتفهُ الجوال ينظر بشاشته لتجحظ عينيه فور رؤيته هوية المتصل، فقد رأى نقش اسم والد جوهرتهُ الثمينة وعلى الفور أجاب على الهاتف قائلاً بنبرة ظهرت متلهفة:
-السلام عليكم
أجابهُ محمد بوقارٍ:
-وعليكم السلام ورحمة الله وبركاته، ازيك ياحضرة الضابط
بخير يا عمى محمد الحمدلله… ليسترسل متلهفًا:
-حضرتك فكرت في طلبي لأيد جنة
تنهد محمد ليجيبهُ بهدوء:
-أيوة يا أبني،ما أنا متصل بيك علشان أبلغك بقراري.
إبتلع محمود لعابه وانتظر مترقبًا لتمر الثواني عصيبة عليه قبل أن يسترسل الأخر برزانة:
-بلغ الحاج عبدالله إننا في انتظاركم بكرة بعد أذان العشاء علشان تشرفونا وتشربوا معانا الشاي
لم يصدق ما استمعته اذنيه ليتساءل ببلاهة اراد بها التأكُد:
-يعني أبلغ أبويا وأقول له إن حضرتك وافقت يا عمي محمد ولا أبلغه بإيه بالظبط؟
ابتسم محمد على تلبك الشاب ليبلغهُ صراحتًا:
-أيوة يا ابني موافق، وربنا يعمل اللي فيه الصالح
هتف بحبورٍ ظهر جليًا بصوتهِ الحماسي:
-ربنا يخليك يا عمي الحاج، أنا مش عارف اشكرك ازاي،أوعدك إنك مش هتندم أبداً على قرارك، وهعمل كل اللي في وسعي علشان أخلي جنة اسعد إنسانة في الدنيا كلها
سعد محمد كثيرًا بعد استماعه لوعود ذاك العاشق، بينما أغلق الاخر الهاتف وعلى الفور أبلغ والده الذي سعد كثيرًا بذاك الحدث الهام وشكر نجلهُ معبرًا له عن امتنانه لاصراره لاتمام تلك الزيجة التي ستُنهي الخلافات وتُغلق باب الماضي للأبد، بالفعل ذهب عبدالله بصحبة أنجاله ورجال عائلته فاستقبلهم محمد وعائلته بكثيرًا من الترحاب واتفقا على موعد قراءة الفاتحة فاقترح عبدالله أن يعقدوا القران بحيث يكون إتمام الزواج خلال أربعة أشهر فور إنتهاء جنة من اختبارات نهاية العام،بالفعل تم عقد القران داخل حفل كبير اقيم خارج منزل محمد الأنصاري حضره جميع أهل البلدة ليكونوا شاهدين على غلق تلك الصفحة السوداء وفتح أخرى جديدة بين العائلتين
أما داخل المنزل كان تجمع نساء العائلتين بل البلدة بأكملها لحضور حفل عقد القران، خرجت جنة من غرفتها بعدما انتهت متخصصة الميك أب من وضع اللمسات الأخيرة من الزينة لها، التفتت جميع أنظار النسوة لتلك الجميلة التي خرجت عليهم بكامل اناقتها وسحرها، وقفت عفاف لاستقبال عروس نجلها الغالي وأقبلت عليها لتسحبها لداخل أحضانها وهي تتحدث قائلة بانبهار:
-بسم الله ماشاء الله، إيه القمر ده
أبعدتها عن حضنها لتنظر لها واسترسلت بما أخجل جنة وجعل وجنتيها تتلونان باللون الوردي:
-كان عنده حق محمود لما حارب الدنيا كلها علشانك
تبسمت خجلاً لتتحدث بصوتٍ مبحوح:
-متشكرة يا طنط
أقبلت منى عليها وتحدثت وهي تحتضنها بحفاوة:
-ألف مبروك يا قلبي، وأخيرًا يا جنة
إبتسمت لها لتردد:
-وأخيرًا يا مُنى
تلقت التهنئة من الجميع ثم جلست بالمكان المخصص لها وابتدين النسوة بالغناء والتصفيق حتى استمعن لصوت إطلاق النار بالخارج مما يعني إنتهاء المأذون الشرعي من عقد القران فتعالت الزغاريد تعبيراً عن فرحتهم
أما بالخارج، انتهى عقد القران ليقف محمود يتلقى المباركات من محمد الأنصاري وأشقائه وأبناء عمومته، الجميع قدم التهنئة إلا ذاك الواقف بعيدًا ويبدوا على وجههِ علامات الضيق، اقترب عليه وتحدث بنبرة هادئة:
-إيه يا على،مش هتبارك لي ولا إيه؟
رمقهُ بنظرة جادة فاسترسل وهو يبتسم باسطًا يده بالسلام:
-خلاص بقى يا على، فكها شوية وابتسم لله يا اخي، إحنا خلاص بقينا أهل ونسايب ومينفعش نفضل قافشين من بعض كدة
شبح ابتسامة ظهر فوق ثغره ليمد يده يقابل خاصته وتحدث بنبرة هادئة:
-مبروك يا حضرة الظابط
ابتسامة واسعة زينت ثغره واقترب عليه ليجذبه داخل احضانه ليتحدث بدعابة نال بها استحسان الأخر:
-المباركة متنفعش على الناشف كدة يا أبو نسب
تنهيدة هادئة خرجت من أعماق صدر محمد الذي كان يتابع نجلهُ وزوج ابنته الحديث ليتنهد براحة بعدما اطمئن قلبه، استأذن محمود من والد عروسه ليذهب لعروسه بالداخل فوافق وبعث معه نجله الاصغر ليصطحبه للداخل، كانت تجلس وسط الجميع تشعر بسعادة الدنيا، ارتجف جسدها وشعرت بفراشاتٍ تداعبُ أسفل معدتها فور رؤيتها لفارس أحلامها الذي طل من البوابة الرئيسية ليحوم بعينيه وسط الجميع باحثاً عن حبيبته التي وبالأخير ظفر بها، تحرك إليها وكأنهُ منساقًا حتى وصل لعندها، قابلتهُ والدتهُ التي احتضنته وقبلت وجنتيه وأيضاً خالته وجميع اقاربه، تحرك صوب سامية التي قبلت وجنتيه لتتحدث بحبورٍ ظهر بعينيها:
-الف مبروك يا حبيبي
رفع كف يدها ليقبلهُ وتحدث بتمني:
-إدعي لي ربنا يتمم لي فرحتي على خير يا ماما
نطقها وهو ينظر لتلك المنتظرة دورها وهي تتطلع عليه بسعادة ممزوجة بخجلٍ شديد مما زاد من توهج وجنتيها ليزيد من اشتعال روح ذاك العاشق، تحرك إليها ليقف مقابلاً لها متأملاً بجمال عينيها للحظاتٍ مرت على كلاهما كدهرٍ، تناسا من حولهما ليسرح كلًا منهما بعينين الأخر ويتوه داخل بحورهم الغريقة، وبدون سابق إنذار جذبها ليسكنها بأحضانه منساقًا لأمر الهوىّ،أغمضت عينيها لتتنعم بأولى أحضانه الحلال ليُشدد هو من ضمته لها،استفاقا على حاليهما عندما تعالت الأصوات المداعبة لهما ليبتعد عنها ثم بسط كفاه وأحاط بهما وجنتيها ليتعمق بمقلتيها متحدثًا بحالة عالية من الوله:
-مبروك يا جنة
الله يبارك فيك يا محمود…نطقتها بعينين يملؤهما خجلاً ممزوجًا بعشقٍ هائل،وأثناء وقوفه قبالتها اتجه إليهم أشرف إبن عمها والذي كان قد طلب يدها للزواج سابقًا وكالعادة رفضت عرضه،إقتحم حفل النساء وتوجه إليهم وبكل حِدة نظر لها وتحدث وهو يُبسط يده لمصافحتها:
-مبروك يا جنة
إشتعل داخل محمود من ذاك الوقح الذي اقتحم خصوصية النساء وخصوصًا جنة التي كانت تاركة لشعرها العنان دون ارتدائها للحجاب على إعتبار أنهُ حفل نسائي ولن تطأهُ قدم أية رجُل،ومازاد من إحتقان غضبه هو رؤيتهُ لتلك الجنة وهي تتأهب ببسط ذراعها لتبادلهُ المصافحة،جن جنونه وبلمح البصر وقف أمامها ليُخبأها خلف ظهره ثم رمق أشرف بنظراتٍ نارية ليهتف بنبرة حادة:
-إنتَ مين سمح لك تدخل بين الستات وتقف قدام جنة وهي من غير حجاب؟
نعم يا حبيبي، إنتَ عاوز تمنعني من دخول بيت عمي… جملة حادة نطق بها أشرف بغضبٍ حاد لتهتف سامية بنبرة مرتبكة لتهدأة الوضع:
-كلام إيه بس يا ابني اللي بتقوله ده، محمود مايقصدش
إقتربت عفاف من نجلها تحاول تهدأته ليهتف ومازالت تلك المرتابة تحتمي خلف ظهره كأنهُ حِصنها المنيع:
-لا اقصد يا ماما،البيوت ليها حُرمة ودخولها ليه أصول
هتف غاضبًا:
-لا يقصد يا مرات عمي واتجرأ ونطقها
واسترسل متهكمًا تحت همهمات النسوة:
-عيشنا وشوفنا يا ولاد،جه اليوم اللي إبن التُهامية بيطرد ولاد الأنصاري من بيوتهم
بس العيب مش عليك يا حضرة الظابط، العيب على الرجالة اللي وافقوا بالمسخرة دي
واسترسل مبدلاً الأدوار:
-مع إن أنا اللي المفروض اسألك، إنتَ إيه اللي مدخلك بيوتنا وداخل تدوس في وسط حريمنا
أجابهُ بقوة وحِدة:
-والله انا داخل ابارك لمراتي ومستأذن من صاحب البيت وأخو مراتي هو اللي دخلني لحد هنا واستأذنا من الستات قبل ما ندخل، إنتَ بقى داخل ليه؟!
كاد أن يتحدث لولا صوت محمد الأنصاري الذي صدح من خلفهما وهو يهتف بحِدة بعدما بعثت ليلى بإبن خالتها الصغير،ليستدعى والدها كي يفض ذاك الإشتباك قبل أن يتحول لساحة معركة حسبما خطط له أشرف:
-فيه إيه يا أشرف، إيه اللي مدخلك عند الحريم وصوتك عالي ليه؟
ارتبك بوقفته وبلحظة تحولت ملامحهُ من غاضبة إلى حزينة مستكينة ثم تحدث بصوتٍ خفيض يشتكي محمود:
-انا كنت داخل أبارك لجنة يا عمي، لقيت حضرة الظابط وقف في وشي ومنع بنت عمي إنها تسلم عليا زي ما انتَ شايف كدة،ومكفهوش كدة بس،ده كمان طردني من بيتك،يرضيك كدة يا عمي
كاد محمود ان يتحدث اوقفته إشارة من كف محمد الذي تحدث بحدة إلى أبن شقيقه لعلمه بمكره:
-وإحنا من أمتى بندخل نسلم على الحريم في الأفراح يا أشرف،ما أنتَ عارف إن فيه بنات كتير بيبقوا واخدين راحتهم ومطمنين إن محدش هيدخل غريب
واسترسل لرؤيتهُ الإعتراض في عينه:
-طب محمود داخل يسلم على عروسته وأنا اللي سمحت له يدخل بعد ما اتصلت بمرات عمك وامنت الدنيا هنا والبنات ستروا نفسهم، إنتَ بقى تدخل ليه
وهنا قرر محمود التدخل ليتحدث باحترام:
-أنا لما طلبت منك ادخل طلبت علشان أبارك لمراتي يا عمي، وعمري ما أجرؤ إني أطرد حد من بيتك وبصفتي إيه أصلاً هطرده، لكن أنا بتكلم في اللي يخصني، لما تكون جنة قاعدة براحتها من غير حجاب وألاقي الاستاذ أشرف داخل عليها من غير إحم ولا دستور، طبيعي أقوله يخرج علشان أستر مراتي
حصل خير يا ابني، قدامي على برة يا أشرف… تحركا للخارج فالتفت محمود للخلف ينظر على تلك المنكمشة خلفه ممسكة بحلة بدلته ليرمقها بحدة لم يستطع مداراتها، اقترب ليميل على أذنها هامسًا بنبرة تحمل حممًا بركانية:
-حسابك معايا بعدين،أنا هعرفك إزاي تمدي إيدك لراجل وتقفي قدامه بشعرك
قال كلماته الغاضبة لينطلق للخارج تحت ارتعاب قلب تلك العاشقة التي ترقرقت الدموع بعينيها.
يتبع.نوفيلا
«يا كُل كُلي»
بقلمي روز أمين
🔹الفصل الأخير🔹
قال كلماته الغاضبة لينطلق للخارج تحت ارتعاب قلب تلك العاشقة التي ترقرقت الدموع بعينيها
لتقترب منها عفاف وتحاول تهداتها بتلك الكلمات:
-إهدي يا جنة الناس بتبص عليكِ
نظرت إلى والدة حبيبها لتهمس بضعفٍ وارتياب:
-شفتي محمود وعمايله يا طنط، زعل واتنكد ونكد عليا في اهم يوم في حياتنا
إحتضنتها بحنان وتحدثت بمشاكسة:
-بيغير عليكي يا عبيطة،شوية وهيهدى وييجي يقعد ويتعشى معاكِ كمان
حولت بصرها لتنظر إلى سامية مسترسلة بدعابة تلطف بها الاجواء:
-هو أنتِ مش عاملة عشا للعرسان ولا إيه يا أم علي؟
عاملة لهم الحلو كله يا حبيبتي،هو أنا عندي اغلى من جنة وعريسها…نطقتها عفاف وهي تحتضن صغيرتها لتهديء من روعها،إنتهى الحفل وفوجئت جنة برحيل محمود مع عائلته بعدما تحجج للجميع بإصابته بوجعٍ شديد بالرأس،ذهب تحت حزن جنة التي تحركت إلى غرفتها ابدلت ثوبها لمنامة مريحة ثم جلست فوق تختها وأمسكت بيدها هاتفها الجوال وبدأت بالإتصال على رقم سارق قلبها لكنها سرعان ما أصابها الحزن حين استمعت لرفضه للمكالمة،اعادت الاتصال مرةً أخرى ولم يتغير الامر كثيراً وانقطع الاتصال فور محاولتها،بدون سابق إنذار اغرورقت عينيها بالدموع وما شعرت إلا ودموعها تنساب بغزارة فوق وجنتيها،أما ذاك المشتعل الجالس فوق تخته فنظر للهاتف ينتظر محاولة جديدة منها لكنها خزلته،تنهد بضيق وأمسك هاتفهُ ليضغط على زر الاتصال بتلك الجميلة بعدما شعر بوخزة بقلبهِ بسببها،كانت تبكي بشدة إلى أن إستمعت لرنين الهاتف فالتقتطه بلهفة وهي تُجيب بصوتٍ متقطع بفضل بكائها وعدم السيطرة:
-انتَ مبتردش عليا ليه يا محمود، مش كفاية انك سبتني في أسعد يوم في حياتي من غير حتى ماتسلم عليا ولا أشوفك قبل ما تمشي
يعنى إنتِ مش عارفة أنا عملت كدة ليه يا أستاذة… نطقها بصوتٍ غاضب ممزوج بالعتاب، أجابته بنبرة مختنقة:
-وأنا ذنبي إيه في اللي حصل من أشرف، بتحملني نتيجة تصرفه ليه؟!
هتف بنبرة حانقة ارعبتها:
-ذنبك إن الهانم كانت واقفة قدام البيه ومحاولتش تداري نفسها من نظراته الوس…، لا وكمان بتمد له إيدها علشان تسلم عليه
اجابته باعتذار:
-أنا أسفة بس والله ارتبكت من وجودة وملحقتش أفكر
واستطردت بدهاء لاستدعاء مشاعرهُ الهائلة تجاهها:
-وبعدين إنتَ عاوزني افكر في إيه وإنتَ قدامي
شفع لها شعورها وتفخيمها لحدث ارتباطهما ليتذكر على الفور تلك المشاعر المتوهجة التي اقتحمت قلب كليهما، ليهديء ويتحدث بنبرة صوت أهديء كثيراً:
-خلاص يا جنة، بس دي أخر مرة اشوفك بتسلمي فيها على راجل تاني، أي حد يمد لك إيده قولي له جوزي مانعني أسلم على حد، مفهوم؟!
نزلت كلمته على قلبها زلزلته لتتحدث بصوتٍ يذوبُ عِشقًا وهيامًا:
-هو أنتَ فعلاً بقيت جوزي وأنا بقيت مراتك يا محمود
أبدلت كلماتها حالهُ بالكامل ليرتجف قلبه ويكادُ ينطق صارخًا تاركًا صدره، ليتحدث بنبرة تهيمُ شوقًا متناسيًا تمامًا غضبه:
-أيوة يا حبيبتي، إنتِ خلاص بقيتي مراتي حبيبتي اللي بوجودها الدنيا ضحكت لي من تاني، أنا بحبك اوي يا جنة، كنت هموت واضمك قوي لصدري وكنت معشم نفسي ادوق كريزك النهاردة
ابتسمت ثم تحدثت بمشاكسة بعدما جنبت الخجل لتحثهُ على الندم:
-والله كريزي كان قدامك وكان ممكن تدوقه وخصوصًا إن ماما كانت مجهزة لنا عشا لوحدنا في اوضة الجلوس، بس إنتَ اللي اتلككت ومشيت يا حضرة الظابط
بنبرة شغوفة اجابها:
-ملحوقة يا قلب حضرة الظابط،بكرة أول ما أقوم من النوم هكلم حماتي وأقولها تجهز لي عشا بدل اللي راح عليا امبارح
ضحكت وتحدثت بمشاكسة:
-ماخلاص يا حبيبي،هي حكاية،دي كانت فرصة وانتَ ضيعتها بعنادك وغضبك
خرجي انتِ نفسك من الموضوع وسبيني مني لحماتي وهي هتظبطني… ضحكت بدلال وتحدثت:
-واثق قوي إنتَ في حماتك
كُل الثقة،حماتي بتحبني وبنتها بتعشقني
بحبك يا محمود،بحبك…نطقتها بنبرة هائمة مغمضة العينين جعلت من صدرهِ مشتعلاً بنار الهوى، ليسترسلا حديثيهما العاشق حتى الساعات الاولى من فجر اليوم الجديد
******
بعد مرور إسبوع من عقد القران،بمدينة القاهرة الكبرى،وبالتحديد داخل حديقة واسعة مملؤة بالأشجار العالية والنباتات والزهور بألوانها الزاهية،تتحرك تلك الجميلة بخطواتٍ مرحة تدل على مدى سعادتها ويرجع هذا لمجاورتها لذاك الحنون وهما يتشابكان الايدي ويتحركان بمرحٍ وسعادة، تحدثت بنبرة مرحة:
-إعمل حسابك إن كل اسبوع هتخرجني خروجة زي دي يا حضرة الظابط
واستطردت بنبرة حماسية:
-حتى بعد ما نتجوز هتفضل تخرجني كل أجازة
ضيق بين حاجبيه ليتحدث ساخرًا:
-نعم!،هو إنتِ مستنيانا نتجوز علشان نقضيها خروجات، إنتِ فاهمة الجواز غلط خالص يا ماما
تعمق بعينيها ليغمز بوقاحة مستطردًا:
-الناس بتتجوز علشان تقضي الأجازة في البيت، وخصوصًا في أوضة النوم، وتحديدًا بقى فوق السرير، و…..
كاد أن يُكمل في وقاحته لولا صوتها الذي خرج متسرعًا ليمنعه من التمادي:
-بطل قلة أدب واحترم نفسك
قهقه عاليًا ثم تحدث متماديًا بوقاحته:
-اسمعي مني،الكلام اللي بقولهولك ده هو الأدب بعينه
ليستطرد لائمًا بجبينٍ مُقطب:
-وبعدين إيه بطل قلة أدب دي،هو أنتِ ناسية إنك بقيتي مراتي وحلالي ولا أيه؟
وما أن نطق بجملته حتى اكتسى وجهها بحُمرة الخجل مما اثاره ليتحدث بنبرة حنون وعينين هائمتين:
-بحبك وبعشق خجلك يا جنتي
أخذت نفسًا عميقًا ونظرت له بولهٍ لتتحدث:
-عارف يا محمود،أنا لحد الوقت مش مصدقة إننا إتجوزنا
واستطردت بحماس:
-ساعات بقوم من النوم واجري على درج الكومدينو اجيب منه ألبوم الصور بتاعت كتب الكتاب علشان اتأكد إنه مش حلم جميل وزي العادي هينتهي بمجرد ما أقوم من النوم
تنهد بهدوء ثم تحدث بنبرة حنون:
-إحنا تعبنا وإتعذبنا قوي في حبنا يا جنة، بس الحمدلله، ربنا جمع شملنا وأخيرًا بقيتي مراتي، وكلها كام شهر وهتبقي منورة بيتي
توقف وامسك كفي يداها وتعمق بعسليتيها ليستطرد واعدًا بهيام عاشق:
– وساعتها عمري ما هخرجك من حُضني تاني أبدًا، هعوضك واعوض نفسي عن سنين الحرمان اللي عيشناها
بحبك يا محمود… نطقتها بعينين متأثرتين بغرامه ليتهلل وجههُ بسعادة لا يوجد بمثيلها بالحياة.
******
بعد مرور عِدة أشهر
وبعد طول إنتظار قد تحقق الحلم وتم حفل زفاف تغنت بهِ أهل البِلدة بأكملها، اصطحب محمود عروسهُ الجميل وصعد لمقر شقتهم بالطابق الثالث بمنزل أبيه، كان يقف ببهو الشقة مرتديًا حلة عُرسه التي جعلت منهُ وسيمًا للغاية، يجوب المكان ذهابًا وإيابًا بقلبٍ يغلي من شدة اشتياقه،ينتظر خروج والدة عروسه وشقيقتها اللتان ولجا لغاليتهما كي يطمأنتا عليها قبل تركها وذهابهما لمنزلهما،اتسعت عينيه وابتلع لعابهُ حين وجدهما تخرجتان من الغرفة لتتحرك إليه سامية وتحدثهُ بدموعها المتوسلة:
-خلي بالك منها يا محمود
هتف بنبرة حماسية:
-ما تقلقيش يا ماما،جنة في عنيا،إنتِ اصلك متعرفيش قيمتها عندي
تبسمت الأم من بين دموعها لتتحدث إليه ليلى بتوصية:
-إبقى اكلها أي حاجة علشان دي ما اكلتش خالص من الصبح
أومأ بعينيه مبتسمًا ليُجيبها:
-ما تقلقوش يا جماعة…نطقها ليسترسل بمداعبة:
-هأكلها واخلي بالي منها واشربها اللبن واغسل لها سنانها قبل ما تنام
لكزته سامية بصدره لتتحدث بابتسامة:
-بتتريق علينا وليك نفس تهزر يا ابن عفاف
تحدث لائمًا بمشاكسة:
-اعمل إيه بس يا ماما، إنتوا ليكم ساعة جوة مع عروستي وسايبيني مرمي في الرسيبشن لما قربت اتحنط من كتر الوقفة، وفي الاخر طالعين تكملوا معايا الوصايا العشرة
ليستطرد بعدما فاض بهِ الكيل:
-أنا عريس يا جماعة لو مش واخدين بالكم، ومش أي عريس، ده أنا واحد ليه سنين مستني اللحظة اللي إنتوا قاعدين تضيعوهالي بوقفتكم دي
جذبت ليلى يد والدتها لتهمس بجانب أذنها:
-يلا يا ماما خلينا نمشي، ده باينه مجنون، ده هيتجوز على روحه وإحنا واقفين
ابتسمت سامية على حديث ابنتها وبدون حديث تحركت بجانبها تاركين خلفهم ذاك المُلتاع الذي وما أن خرجتا وتأكد من غلقيهما الباب حتى هرول مسرعًا نحو باب غرفة النوم يتطلعُ عليها ليجدها تجلس على طرف الفراش ومازالت مرتدية ثوب زفافها الرائع وطرحتها تنسدل خلف ظهرها، ناظرة بخجلٍ أسفل قدميها وهي تفرك كفيها ببعضيهما بتوترٍ ظهر جليًا فوق ملامحها، اقترب منها بساقين تكاد تطير فرحًا حتى وقف قُبالتها، مد يده لها فتحمحمت لتُسلمهُ خاصتها ليجذبها لأعلى لتقابلهُ الوقوف، ابتسم على خجلها ثم أمسك ذقنها ليرفع وجهها إليه ليتحدث بنبرة حنون بعدما تلاقت الأعيُن:
-هو أنتِ بجد مكسوفة مني يا جنة؟
ابتسمت خجلاً ومازالت تنظر للأسفل متلاشية النظر لعينيه ليستطرد بولهٍ:
-ده انا محمود حبيبك،طب بصي كدة في عيوني وشوفي شوقي
تطلعت إليه تتعمق بزرقاويتيه لتغوصا داخلهما بنظراتٍ تذوبُ عشقًا،ظلا يتعمقان بالنظرات وقد قالت العيون حديثهما الذي أشعل من جسد كلاهما وانتفض قلبيهما اشتياقًا، نظر لكريزتيها المرتعشتين وابتلع لعابه وبدون مقدمات مال بطوله الفارع عليها ليلتقط شفتيها بين خاصتيه ويغوصا بقُبلة رقيقة بادلته إياها بسعادة بالغة، بعد قليل ابتعد عنها لاهثًا ليأخذا أنفاسهما، ثم ضمها ضاغطًا على جسدها اللين بضمة كادت أن تكسر عظامها لشدة أشتياقه،ليتحدث بنبرة سعيدة:
-أخيراً بقيتي في حُضني، أخيراً إتقفل علينا باب واحد وبقيتي ملكي، مراتي حبيبتي
ابتسمت خجلاً،بصعوبة بالغة تحامل على حاله واخرجها من داخل أحضانه ليسترسل بعدما تحمحم :
-بقول لك إيه يا حبيبتي، تعالي نغير هدومنا ونصلي الأول
واستطرد بما جعل وجنتيها تشتعلان بحمرة الخجل:
-علشان لو فضلنا على الوضع ده خمس دقايق كمان، لا هنصلي ولا حتى هنلحق نغير هدومنا
إبتلعت لعابها خجلاً لتبتعد سريعًا عنه وتحدثت:
-طب اخرج برة على ما أغير هدومي
طب مش محتجاني افتح لك سوستة الفستان…وبرغم نطقه للجملة بعفوية إلا أن جبينها تصبب عرقًا من شدة خجلها، اومأت بموافقة لتيقنها من أنها لن تستطيع التصرف بها بدونه، شرع بفتح السحاب وما أن رأى بشرتها الناعمة حتى ازدرد لعابهُ لكنهُ تمالك من حالة الاشتياق والرغبة الملحة وتحرك صوب الباب ليختفي سريعًا تاركًا إياها كي تستعد للصلاة، بعد قليل كانت تجلس خلفهُ حتى انتهي من أداء الصلاة ليلتفت لها ويقوم بوضع كف يده على مقدمة رأسها ويقوم بالدعاء لهما، بعد قليل وقف ثم بسط ذراعهُ لها ليسحبها للاعلى معه ومن دون حديث جذبها لتسكُن داخل احضانه ويضمها بقوة كي يُشبع روحهُ المشتاقة،أشبه بجائع تائهًا وسط صحراءٍ قاحلة منذ عدة أيام وعلى حين غِرةً وجد أمامهُ منضدة يوجد عليها جميع أصناف الطعام والشراب المفضلةِ لديه، والأن عليه ان يسد جوعه ويروي عطش لياليه، نزع عنها ثوب الصلاة ليلقي به أرضًا بعشوائية تحت خجلها الشديد عندما وجدته يتخلص من ثيابه هو أيضًا بعدم صبر، حاوط كتفيها بكفي يداه ثم نظر لعينيها وتحدث باشتياقٍ جارف:
-نورتي دنيتي يا روح قلبي
إبتسمت خجلاً ليُشرع باخذها فوق تختهما ليعيشا معًا داخل عالمهما الخاص وليبدأ أولى جولاتهما العشقية حيثُ بث كُلاً منهما للأخر مدى عشقهِ واشتياقه الجارف جراء سنوات الحرمان التي عاشها كلاهما، بعد وقتٍ طويل تمدد بجوارها بأنفاسٍ لاهثة وقلبٍ سارحًا بسماء الهوى، ليجذبها متلهفًا داخل أحضانه ليُذيقها حنانه
محمود…نطقتها بنبرة هائمة وهي تنظر لعينيه بولهٍ جارف ليجيبها على الفور متلهفًا وهو يلثم وجهها بشفتاه بنعومة جعلت القشعريرة تجري بجميع أنحاء جسدها:
-يا عيون محمود،وروح محمود،وقلب محمود من جوة
تنهدت براحة لتسألهُ مغمضة العينين:
-هو أنا فعلاً بقيت مراتك خلاص؟
ابتسم براحة ثم أخرجها من أحضانه ليتطلع لعينيها بولهٍ أظهر كم العشق الساكن بداخله لتلك الجميلة مالكة القلب:
-بقيتي مراتي وروح قلبي ونور عيوني اللي بقيت بشوف بيها الدُنيا
تبسم ثغرها مما ادخل السرور على قلبه ليكمل بنبرة شغوفة:
-واللي في حُضنها هعيش جنتي على الأرض وهعيشها
انتهى من كلماته ليجذبها من خصرها مقربًا جسدها من خاصته منهالاً على شفتيها كالجائع الذي وجد امامهُ وجبتهُ المُفضلة بعد جوعٍ استمر لايامٍ طوال لتذوب معهُ من جديد.
تمت بحمد الله.
