قاعده مهره في معمل التحاليل اللي هي شغاله فيه وبتكلم حبيبها اللي بتحبه في التليفون بتقول له :
_هتيجي تقدم لي امتى يا عمرو انا قلت لماما زي ما احنا ما متفقين هتبعت بقى مين يكلم بابا الاول قبل ما تيجوا .
رد عليها عمر وهو قاعد في الاوضه بتاعته بيلف في السيـ,,ــجاره اللي بيشربها زي المحتر$فين بالظبط وقال لها :
_ان شاء الله هبعت عمتي النهارده تكلم والدتك وتطلب منها ايدك يا حبيبتي .
ردت عليه مهره بفرحه وقالت له :
_ايه اخيرا يا عمرو حلمنا هيتحقق وهنتخطب بعد حب سنتين .
رد عليها عمرو بنفس الفرحه بتاعتها وقال لها :
_انا كمان مبسوط جدا يا حبيبتي بس خايف ان باباكي يكس$ر فرحتنا احنا الاتنين ويرفض .
ردت عليه مهره بامل وقالت له :
_وبابا يرفض ليه يا عمرو انت ما شاء الله شغال وعندك شقتك ونوعا ما حالتك الماديه مستقره ايه اللي هيخلي بابا يرفض .
رد عليها عمرو وقال لها وهو بيفسر لها مخاوفه :
_خايف يرفض علشان خاطر فرق التعليم ما بيني وبينك انا معايا دبلوم وانت في الكليه اي اب مكانه هيتمنى لبنته عريس يكون مستواها احسن من مستواه في التعليم .
جاوبته مهره وهي بتنفي كلامه وقالت له :
_لا يا عمرو ما تقلقش ان شاء الله بابا هيوافق ومش هيعترض طالما انا عايزاك وموافقه عليك اطمن انا هقول لماما تعرفه ان انا موافقه عليك وان انت اللي انا بتمناه ونفسي اكمل حياتي معاه .
اتنهد عمر واخذ نفسه وهو بيشرب السيجاره ورد عليها :
_ليه يا حبيبتي انا بجد مستني اليوم ده بفارغ الصبر علشان تلبسي دبلتي في ايديكي والبس دبلتك في ايديا وتبقي ملكي قدام الدنيا بحالها .
وفضلوا يتكلموا هم الاثنين مع بعض في التليفون ويتفقوا هيعملوا ايه في الخطوبه ومش عاملين حساب ايه اللي هيحصل،
وراحت عمه عمرو لبيت مهره تطلب ايديها وقالت لوالدتها:
_ازيك يا ام مهره عامله ايه يا غاليه ليكي وحشه والله من بقالي كتير ما شفتكيش .
ردت ام مهر عليها وقالت لها وهي بترحب بيها :
_انا بخير الحمد لله يا حاجة عزيزه سالت عليك العافيه نورتينا يا حبيبتي وشرفتينا .
ابتسمت لها الحاجة عزيزه وقالت لها برجاء :
_انا جايه لك يا ام مهره في طلب عزيز عليا ونفسي ما تردنيش وانا خايبه الرجاء .
ردت عليها ام مهره وقالت لها :
_اؤمريني يا ست عزيزه وانا عيني ليكي لو في ايدي حاجه اقدر اعملها لك هعملها لك اتفضلي يا حبيبتي .
طلبت منها عزيزه وقالت لها على اللي هي جايه عشانه :
_انا جايه اطلب منكم ايد الاموره مهره لعمرو ابن اخويا شاب مجدع وطول بعرض والله اكبر عليه شغال شيف حلواني واد كسيب وعنده شقته .
ام مهره فرحت من جواها كاي ام متقدم لبنتها عريس وهي طبعا ما تعرفش عمرو ولا تعرف عنه اي حاجه هي عارفه بس عمته لانهم كانوا بيروحوا الطابونه العيش مع بعض فكانوا بيتكلموا مع بعض زي اي اثنين بيتكلموا فعلشان كده هي عارفاها،
وقالت لها ام مهره بتمني:
_هو انا طول انا اسيبكم يا حبيبتي لما يجي ابو مهره ان شاء الله هفتحه في الموضوع واللي فيه الخير يقدمه ربنا .
قامت عزيزه ناويه على انها تروح وقالت لها برجاء وتمني :
_ان شاء الله ابو مهره هيوافق ومش هيكسفني وكلمتين حلوين منك كده في حق الواد عمرو ابن اخويا علشان نكلل الموده دين بالنسب يا حبيبتي .
ابتسمت لها ام مهره وودعتها وما فيش ساعتين وجوزها رجع من الشغل وفتحت معايا الموضوع وقالت له :
_ بقولك ياأبو مهرة بنتنا جاي لها عريس بسم الله ماشاء الله شاب حليوة وشغال شيف حلواني وعنده شقته عمته جات لي النهاردة وطلبت مني مهرة .
استمع لكلامها وسألها باستفسار:
_ إبن مين ده ياأم مهرة علشان أسأل عليه ؟
أم مهرة جاوبته علي كل أسألته إللي سألها بخصوص العريس ورد عليها :
_ هسأل عليه الأول وأشوف إذا كان مناسب ولا لأ وبعدين نرد عليهم براحتنا .
وبالفعل سأل أبو مهرة عن عمرو كذا واحد وقالوا له إللي ميسرهوش أبدا فراح البيت ونده علي مراته وقال لها :
_ دلوقتى ياأم مهرة أنا سألت علي الولد إللي متقدم لبنتنا ومن الآخر كده مش عاجبني خالص الولد بيشرب سجاير كتير ومن إللي بيمشوا مسقطين البنطلون ومش مستقر في شغله خالص بيروح الشغل يوم وبيقعد عشرة ،
وكمل وهو بيفهمها كل اللي عرفه :
_ وكمان معاه دبلوم وهي في آخر سنة في الكلية ،
وانا عايز لبنتي واحد من مستواها التعليمي ويبقي راجل ملو هدومه كده مش عيل زي العيال التوتو بتاعت اليومين دول .
ردت عليه أم مهرة وهي مش مواقفه علي كلامه وقالت له :
_ بس أنا سألت مهرة وأخدت رأيها وحسيت إنها ميالة والحاجات إللي إنت بتقولها كل شباب اليومين دول بيعملوها ،
بيشربوا سجاير وبيلبسوا علي كيفهم وعايشين سنهم ،
هو احنا هنحكم عليه من لبسه ؟!
وعمته قالت لي كمان إنه شغال وكسيب فاتوكل علي الله وخلينا نفرح ببنتا الكبيرة والفرح يدخل بيتنا وقلبنا .
زهق ابو مهرة عليها وقال لها باستنكار:
_ إنتي إزاي أصلا تقولي لها أنا منبه عليكي متجيبيش سيرة لحد عقبال ماسأل عليه زي مابنعمل كل مرة مالك كده المرة دي خيابانه كدة ومي$ته في العتبة ؟
جاوبته أم مهرة وقالت له بتوضيح:
_ عمته وأمه كويسين جدا وبعدين أبوه عنده أرض وورث وعنده شقته جاهزة يبقي إيه بقي إللي يخلينا نرفض ؟
رد عليها بهدوء علشان يفهمها وجهة نظره وقال لها :
_ هو الرسول عليه الصلاة والسلام قال من شروط الموافقة علي الجواز الورث والحيطان والشقة والعمة والأم!
ولا قال من ترضون دينه وخلقه ،
إحنا مش هنجوزها جوازة والسلام وتطلع زي البطيخة بالصدفة تطلع حمرا وبالصدفة تطلع قرعة ،
فخليكي ماشيه معايا علي نفس الخط ياأم مهرة علشان حياة بنتنا وعمرها ميضيعوش ورا سراب يتعبنا كلنا ،
وبعدين ايه اللي يخلينا نستعجل وندي بنتنا لواحد ناقص عنها في المستوى او مشكوك في اخلاقه مهره تستاهل احسن واحد في الدنيا ما شاء الله عليها جميله وعلى اخلاق ومتعلمه .
اقتنعت مراته بكلامه تمام الاقتناع وقالت له برضا :
_خلاص يا اخويا اللي تشوفه انت تفهم عني وليك نظره في الامور اكثر مني بس هنعمل ايه مع مهره انا استشفيت انها موافقه عليه .
رد عليها ابو مهره وقال لها وهو بيقنعها :
_عين العقل يا ام مهره كده حلو قوي دلوقتي قومي هاتيها لي وانا هتكلم معاها وهفهمها كل حاجه بهدوء ومهرة عاقله وكبيره وعمرها ما هترفض لابوها كلمه .
ندهت ام مهر عليها وقالت لها تعالي علشان خاطر والدك عايزك وراحت مهره تشوف ابوها عايز ايه وقعدت قدامه فقال لها ابوها :
_ايه رايك يا مهره في العريس اللي متقدم لك يا حبيبتي وقبل ما تقولي رايك عايزه اقول لك ان انا سالت عليه وعرفت ان هو مش ولا بد وما يليقش عليك خالص زي العيال التوتو بتوع اليومين دول بيمشي يسقط البنطلون وبيشرب سجاير ومش ملتزم في شغله وانا يا حبيبتي رايد لك واحد اخلاق ومتعلم تعليم عالي يقدر يفهمك ويقدرك .
انص$دمت مهره من كلام ابوها واللي ما كانتش متوقعه ان هو يرفض ابدا بسبب طريقه لبس عمرو وما كانتش متوقعه برده ان هو يعرف ان عمرو غير منتظم في الشغل وردت على ابوها وهي بتفرك ايديها :
_انت سالت مين يا بابا وعرفت الكلام ده كله عمته لما اتكلمت مع ماما ما قالتش اي حاجه من الحاجات دي وبصراحه انا حاسه براحه من ناحيه الموضوع ده .
طبطب ابوه على ظهرها وهو بيقول لها بهدوء :
_شوفي يا مهره يا حبيبتي انت مهره الغاليه العاليه واللي ياخدك لازم يكون على اخلاق عاليه وتدين علشان يحافظ عليك وكمان هو معاه دبلوم وانت ما شاء الله عليك هتتخرجي من الكليه وهتحضري رساله الماجستير على طول زي ما انت بتتمني فسيبك من الموضوع ده خالص علشان انا مش موافق عليه نهائي انت تقدم لك احسن منه قبل كده ورفضناه بسبب حاجات معينه ما تجيش ذره في الحاجات اللي انا عرفتها عن اللي اسمه عمرو ده .
مهره لقيت ان ابوها رافض تماما فما حاولتش انها تدافع عن عمرو او تقول اي حاجه لان ما حدش يعرف ان هي بتكلمه لو باباها عرف هيبهدل الدنيا فسكتت افضل لحد ما تشوف هي وعمرو هيعملوا ايه ،
وعدى كذا يوم وبلغت والده مهره عمه عمرو ان باباها مش موافق وان كل شيء قسمه ونصيب،
وبعد كذا يوم كلمت مهره عمرو في التليفون وقالت له بحزن شديد :
_انا متاسفه يا عمرو على رفض بابا والله انا قلت له ان انا مستريحه وموافقه وهو سال عنك وقالت ان انت مش منتظم في الشغل فعلشان كده هو رافض تماما الموضوع فانا عايزاك تخلي بالك من شغلك شويه وتروح على طول وتلتزم علشان خاطر لما تيجي تتقدم لي تاني بابا ما يرفضش .
اتقفف عمرو من كلامها لانه زعلان جدا بسبب رفض باباها وقال لها بحزن باين على صوته :
_انت ما تعرفيش انا مخنو$ق قد ايه من ساعتها حتى انت رنيتي عليا من كذا يوم وانا ما ردتش عليك بسبب خنقتي انا ما كنتش متخيل اصلا ان باباك يرفض لاي سبب من الاسباب بجد انا نفسيتي تعبانه جدا يا مهره .
ردت عليه مهره وهي بتو$اسيه وبتعرفه انها عمرها ما هتسيبه ولا هتنساه وقالت له :
_انا اصلا اللي ما تخيلش اني اتجوز غيرك ولا اني اعيش مع غيرك يا عمرو اعمل بس اللي بقول لك عليه وباذن الله بابا هخليه يسأل من بعيد لبعيد ويعرف ان انت بقيت ملتزم فيوافق باذن الله .
وفضلوا الاثنين يتكلموا مع بعض ويرتبوا هيعملوا ايه وفعلا التزم عمرو في شغله والناس بقت واخده بالها ان هو بقى يروح الشغل وملتزم جدا فيه،
ورجع اتقدم لمهره تاني وابوها رفض لثاني مره بحجه التعليم بعد ما مهره اقنعت والدتها ان هو بقى ملتزم في شغله لكن باباها كالعاده راسه ناشفه ومش حاسس ان عمرو عريس لايق على مهره ،
وبعد رفضه لثاني مره كلمت مهره عمرو وهي بتقول له :
_يا ترى يا عمرو هتتخلى عني وتسيبني ولا هتعافر عشاني انا مش متخيله ان انا ارتبط بحد غيرك او اسمي يرتبط باسم غيرك انا ليه النهار بحلم باليوم اللي يجمعنا سوا مع بعض في عشنا السعيد الهادي .
عمرو كان متغاظ من جواه بدرجه رهيبه بسبب رفض والد مهره ليه وبقي حاطط الموضوع عند في دماغه ان هو هياخذ مهره يعني هياخدها مش مش حب شديد في مهره لا ده حب تملك عمرو ما بيعرفش يحب وقال لها :
_انت ما تتصوريش رفض والدك ليا لثاني مره جرح كرامتي قد ايه وخلاني صغير في عين نفسي وفي عيني اللي حواليا ولا انا مني قادر اقرب منك علشان خايف عليك وعلى سمعتك ولا انا مني قادر ارتبط بيكي رسمي علشان نعرف نتكلم بحريه ونشوف بعض بحريه وباباكي معاند معانا مش عارف ليه حتى بعد ما التزمت في الشغل .
قالت له مهره وهي بتهديه وبتحاول تقنعه باللي بيدور في دماغها :
_معلش يا عمر استحمل علشان خاطر حبنا يظهر للنور ونتجوز ونعيش مع بعض هنصبر شويه وتقدم ثاني ولعل بابا دماغه تلين والمره دي انا هقف قصاده وهقنعه وربنا يقدرني .
وعدت الايام وعدى كذا شهر ومهره بتحاول تقنع والدتها انها تكلم باباها وانها بتحب عمرو وموافقه عليه،
وطلبت مهره من عمرو ان هو يجي ويقعد مع باباها بنفسه ويحاول يقنعه وهو سمع كلامها ،
وجه اليوم ودلوقتي عمرو قاعد مع والد مهره بيحاول يقنعه وبيقول له :
_انت ليه رافض جوازي من مهره يا عم الحاج انا بحبها وبحب ادابها واحترامها ولو ما كنتش متمسك بيها ما كنتش اتقدمت مره واثنين وثلاثه ليه تقف في طريق سعادتنا طالما هي مرتاحه وانا مرتاح .
انصد$م ابو مهره لما عرف ان هو عارف ان مهره مرتاحه عرف منين وساله :
_انت عرفت منين ان مهره مرتاحه هو انت بتكلم مهره ؟
اتلجلج عمرو وحاسس ان هو وقع في الغلط ورد على ابو مهره وقال له بتحوير علشان خاطر يطلع من الموقف وما ينكدش على مهره :
_لا يا عم الحاج دماغك ما تروحش لبعيد مهره ما بتكلمنيش ولا عمرها كلمتني انا عرفت ارتياحها بالصدفه البحته من واحده صاحبتها تبقى جارتنا فما تظلمهاش وتظلمني انا دلوقتي راجل شغال ومنتظم في شغلي وعندي شقتي وشاري بالغالي وانت رافض ليه بقى ؟
ابو مهره بقى محا$صر من عمرو ومش عارف يقول له ايه لانه بيقول كلام سليم ان بنته فعلا مرتاحه وهم الاثنين عايزين بعض ومصممين على بعض وكل اللي في دماغه بالنسبه لهم هم الاثنين وهم فقال له :
_معلش يا عمرو يا ابني سيبني يومين اقعد مع مهره واتكلم معاها وهديك الرد النهائي اللي لا راجعه فيه بعد كده .
وقام عمرو بعد ما حس ان خلاص قرب من اللي هو عايزه وقلبه حاسس من جواه ان النوبه دي ابو مهره هيستسلم من الامر الواقع وهيوافق ،
وبعد ما مشي قعد والد مهره معاها وقال لها وهو بيحط الصوره الكامله قدامها :
_شوفي يا مهره انا طول عمري متعود عليك عاقله وهاديه وراسيه ،
عمري ما شكيت في ذكائك فانت متاكده يا بنتي ان انت عايزه ترتبطي باللي اسمه عمرو ده بعد كل اللي انا قلته لك ،
يا بنتي الراجل بتدينه واخلاقه مش بلبسه وشياكته ومنظره الخارجي فكري كويس وادي لنفسك فرصه لان ده جواز وعمر هتعيشيه فاختاري صح علشان يوم ما تعيشي تعيشي مرتاحه ورايقه البال وما تتعبيش في حياتك ،
علشان ما ترجعيش بعد كده تندمي وتقولي يا ريت اللي جرى مكان انا ابوكي وليا نظره في الحياه وليا نظره في البني ادم اللي قدامي هتندمي يا مهره اسمعي كلام ابوك يا حبيبتي .
مهره المره دي اتشجعت وقويت وقررت انها تدافع عن حب حياتها وكانها ما سمعتش اي كلام من اللي ابوها قالوا وقالت له :
_انا صليت صلاه استخاره يا بابا وحسيت بارتياح شديد فسيبني اخوض تجربتي بنفسي انا شايفه ان عمرو حد كويس جدا وهيحافظ عليا وهيحبني وهيخليني ملكه وبجد انا مرتاحه جدا جدا وعايزاه .
فقط ابوها الامل ان هو يقنعها ويخليها ما تفكرش في اللي اسمه عمرو ده وترفضه وقعد يجيبها يمين ويجيبها شمال وهي اللي في دماغها في دماغها وقال لها في الاخر بعد ما زهق :
_انت حره انا اللهم بلغت اللهم فاشهد عملت اللي عليا وعملت واجبي كاب خايف على بنته على مصلحته وخلي بالك انا ما ليش في الخطوبه اللي بتطول بعد ما تخلصي السنه دي على طول هتتجوزوا ما ليش انا في اللي يدخل ويخرج عمال على بطال على بناتي ومراتي ،
فانتي مستعده خلاص للخطوه دي وارد عليهم بالموافقه ؟
قلبها اتنطط من جواها من الفرحه خلاص هتتخطب هي وعمرو ومش بس كده ده في اقل من سنه هيتجوزوا كمان ما بقتش مصدقه نفسها من باباها اخيرا وافق وردت عليه وقالت له :
_حبيبي يا بابا ربنا يخليك ليا وما يحرمنيش منك ابدا ويدوم عزك في الدنيا وخوفك عليا يا حبيبي وما تقلقش ان شاء الله هيطلع نصيبي حلو وبكره تشوف وتحكم بنفسك ان انا اخترت صح ،
بلغهم واللي انت عايزه اكيد هيوافقوا عليه .
وطبعا قالت له كده امسكه لان عمرو باباه مجهز بشقته كلها من الالف للياء بدون ما يتعب فيها كالعاده هو متواكل على الغير،
واتخطبوا الاثنين وعدى فتره من الخطوبه واثناء زيارته ليها الاسبوعيه في مره مسك ايديها وقال لها وهو بيبص في عينيها :
_انا مش مصدق نفسي يا مهره ان كلها شهور ونتجوز وتبقي ملك ايديا واضمك لحضني بعد العذاب اللي احنا استحملناه انا وانت يا روح قلبي ،
ومسك ايديها وباسها بكل الحب والاشتياق،
وهي طبعا علشان ما عندهاش خبره دابت من كلامه ومن قربه ونسيت انها لسه مخطوبه وفي بيت باباها ان هو ما يحقلهوش ان هو يمسك ايديها ولا يقرب منها بالطريقه دي،
وراح مقرب من وشها وباسها وهي اتجاوبت معاه ،
وللاسف والدتها دخلت عليها فجاه وشهقت من المنظر وضربت على صدرها وقالت لها :
_اخص عليك يا مهره ايه اللي انت بتعمليه ده ما كنتش اتوقع ان انت تعملي كده في يوم من الايام قد كده هو خلى مستواك انحدر ونسيتي ربك ونسيتي دينك ما احترمتيش ابوكي ،
وبصت على عمرو بصه احتقار وقالت له :
_وانت كمان طلعت ما انتاش راجل ان انت تستحل حرمه البيت اللي انت عايش فيه وما قدرتش الراجل اللي وثق فيك واتمنك ودخلك بيته علشان تعمل كده طب هي عيله صغيره وما عندهاش خبره ومش فاهمه حاجه انت يصدر منك كده اخص عليك .
الاثنين وشهم قلب لون الطيف وبقوا مش عارفين يعملوا ايه وراحت مهره قايمه على مامتها وقالت لها بترجي :
_انا اسفه يا ماما حقك عليا والله ما تزعليش مني والله ما هعمل كده تاني وده وعد مني بس ما تقوليش لبابا صدقيني هخلي بالي بعد كده ومش هعمل كده ثاني بس بالله عليك ما تقوليش لبابا علشان لو قلتي له هيفسخ الخطوبه واحنا خلاص اما صدقنا فاضل لنا شهور بسيطه ونتجوز .
اما هو بص لحماته وقال لها وهو بيمثل الندم :
_والله يا امي ما كنتش اقصد كل اللي في دماغك ده ولا اجيب في بالي انا بصراحه بحب مهره جدا جدا وقربت منها غصب عني وبدون ارادتي فسامحيني وما تقوليش لعمي وانا اوعدك ان انا مش هعمل كده تاني ولا هاجي ناحيته الشيطان هو اللي عمل فيا كده وغلب عليا .
الاثنين استلموها وفضلوا يتحايلوا عليها لحد اما قالت لهم بتحذير هم الاثنين :
_اول واخر مره اشوف المنظر ده يطلع منكم انتم الاثنين انا المره دي هداري عليكم علشان خاطر انت ما كنتوش تعرفوا والعاطفه كانت سايقاكم وهعمل نفسي ان انتم ما تعرفوش،
وراحت مكمله وهي بتحذرهم وبتشاور بصباع ايديها في وشهم :
_بس حذاري الحركات القذره دي تتكرر منكم تاني انتم الاثنين والله ما هفوتها لكم وقد اعذر من أنذر .
الاثنين خدوا نفسهم وتنهدوا بارتياح بعد الرعب اللي كانوا فيه وبعد ما خرجت قررت مهره وقالت له :
_يا نهار ابيض لو كانت قالت لبابا يا عمرو كنت هتضيع من بين ايديا اول واخر مره ان احنا نتهور بالطريقه دي تاني ،
رد عليها عمرو وقال لها :
_خلاص يا حبيبتي اوعدك ان انا هصبر وهمسك نفسي وانا قاعد معاكي ومش هيتكرر كده تاني وربنا يعيني ويقويني على كده .
وعدت الايام وعدت الشهور على مهره وعمرو وهم بيرتبوا لليله عمرهم اللي مستنينها بفارغ الصبر ،
والنهارده جوازهم واللي كانت فيه مهره طالعه زي البدر في ليله تمامه ،
وفضلوا يرقصوا ويغنوا في الفرح كثير وهم الفرحه مش سايقاهم هم الاثنين وخلص الفرح والاتنين دخلوا عشهم السعيد ،
واول ما دخلوا اخذها عمرو في حضنه وقال لها بهمس وهو بيبص جوه عينيها :
_انا بجد فرحان جدا وحاسس اني مالك الدنيا كلها في ايديا وقرب منها علشان يعيشوا ليلتهم السعيده .
فمهرو حاولت تبعدوا عنها وهي بتقول له :
_استنى يا عمرو هنصلي الاول علشان خاطر نبدا حياتنا ببركه ربنا مش عايزين نتسرع يا حبيبي احنا كده كده مع بعض مش هنسيب بعض .
قرب منها عمر ومسك وشها بين ايديه وقال لها :
_لما تكوني في حضني ما تبعديش عن حضني تاني انا مش قادر اصبر وانت قدامي وبين ايديا يا حبيبتي .
وراح مكمل اتمام جوازهم وهو ما رضيش يبداوا بالصلاه ودي كانت اول القصيده .
وعدت الايام على جوازهم ومهره بتتفينا في اسعاد عمرو على اكمل وجه احسن اكل واحسن شرب ودائما واخده بالها من نفسها ولبسها واخده بالها من كل حاجه تخص بيتها على اكمل وجه،
وفي يوم عملت جو رومانسي شموع واضاءه واستنت عمرو يرجع من بره مجهزه الاكل وفضلت مستنيه لحد ما نامت على نفسها وفاقت على صوته وهو بيقول لها:
_مهره انت نمت من بدري كده ليه احنا لسه في اول السهره الساعه يا دوبك اثنين .
فركت مهرة عينيها وهي بتحاول تفتحهم علشان دايخه من اثر النوم وقالت له بعتاب :
_لسه في اول السهره برده يا عمرو الساعه عدت 2 وانت لسه بره هنت عليك بقالك كذا يوم تخرج تسهر بره مع اصحابك وتسيبني لوحدي وانا لسه عروسه ما كملتش شهر جواز ؟
زهق عمرو من عتابها كل يوم عن خروجه وسهره اللي ما بيخلصش وقال لها بزهق:
_بدانا بقى في اللوك لوك بتاع الحريم والنكد اللي ما بيخلصش راجع متاخر ليه وبتعمل ايه وأفسر ايه لا انت عارفه انا ما ليش في الحوارات دي انا بحب اخرج واسهر مع اصحابي على كيفي من غير ما حد يقول لي رحت فين ولا جيت منين فكبري عقلك معايا كده وشغليه علشان نعيش مرتاحين .
اتجمعت الدموع في عيون مهره واخذت منه اول صدمه في حياتها ما كانتش متخيله ان هو هيقول لها كده وردت عليه بعتاب ثاني وقالت له :
_بقى كده يا عمرو دي طريقه كلام تتكلم معايا بيها وانا قاعده هنا قلقانه عليك ومجهزه عشا وعامله لك جو رومانسي وجميل تقوم ترد عليا بالطريقه دي .
وراحت معيطه بصوت عالي هو شايف دموعها وقال في نفسه:
_يادي الليله النكد اللي مش هتعدي الواحد جاي مظبط دماغه ومتكيف وقال هيكمل ليلته بسهره صباحي مع المزه وفي الاخر ابتديتها بالعياط
وراح باصص عليها وقايل لها وهو خارج من الاوضه وسايبها بتعيط:
_ادي الاوضه لك يا ستي عيطي براحتك ونكدي براحتك ابو نكدك وبوزك اللي يقطع الخميره من البيت ضيعتي النفسين الواحد متكيف بيهم ومظبط الجمجمه بيهم .
وراح خارج ورازع الباب وراه وساب لها الأوضة .
طبعا الصدمات نازله على قلبها من طريقته اللي اتغيرت 180 درجه وما كانتش متوقعه منه كده،
وعدت الايام واضطرت مهره تتنازل عن زعلها علشان خاطر تكبر دماغها وما تخربش على بيتها،
وخزين البيت بتاعها خلص اللي كان جاي مع جوازها ما هم بقى لهم شهرين ولا ثلاث شهور كمان بياكلوا فيه وعمرو ما بيروحش الشغل نهائي والفلوس اللي معاهم في البيت خلصت خالص،
فصحي عمرو الصبح كالعاده ومستنيها تقدم له الفطور واما لاقاها قاعده ما بتتحركش من مكانها قال لها:
_هو فين الفطار يا مهره جهزيه علشان انا جعان .
ردت عليه مهره وهي حزينه من جواها وقالت له :
_هنفطر ايه ومنين يا عمرو وانت من ساعه ما اتجوزنا ولا بتشتغل ولا بتديني مصاريف وعايشين على النقطه اللي جات لنا هديه جوازنا وخلاص خلصت .
على صوته وقال لها بزهق :
_هو انت هتتحكمي فيا اشتغل ولا ما اشتغلش انا حر اشتغل وقت ما انا ما عايز واقعد وقت ما انا عايز وتعالي لي بقى قولي لي خلصت الالافات دي كلها فين يا هانم انت كان معاكي اكثر من 5000 جنيه .
ضحكت بوجع وقالت له وهي بتوضح له الفلوس كلها راحت فين :
_يعني ايه راحت فين يا عمر انت يوميا اقل حاجه بتاخدها 100 جنيه وانت خارج احسب بقى شوف بتاخد قد ايه لولا ان ماما كل ما تيجي بتجيب لي حاجات معاها وبتديني فلوس كان زمان ال 5000 جنيه دول ما كفوش وبنفطر وبنتغدى وبنتعشى منين يعني ؟
هو من جواه متاكد انها ما ضيعتش فلوس في الهوا وانها محافظه جدا ورد عليها وقال لها :
_ طيب اتصرفي أنا عايز أفطر شوفي هتعملي ايه ؟
بصت له بإستغراب وقالت له :
_ أتصرف أعمل إيه يعني أنا مبقاش معايا فلوس خالص ولا أي حاجة موجودة في البيت أعمل إيه يعني أروح أشحت ؟!
ضرب كف علي كف من كلامها ويعدين بص لها باستعطاف وقال لها وهو بيبص علي الدهب إللي في إيديها علشان ممعهمش جنيه ومحتاج فلوس علشان الكيف والشرب :
_ طيب بقول لك ايه ياحبيبتي أنا هنزل الشغل من أول الشهر إن شاء الله ومتقلقيش هملي البيت من خيرات الله ،
بس علشان نمشي نفسنا العشر أيام دول هاتي الخاتم ده لما نبيعه ونمشي حالنا بيه ولما أرجع الشغل هجبهولك تاني .
صدقته بطيابتها كالعاده وادتله الخاتم وأخده باعه واداها من تمنه مايجيش ربعه ،
واخد الباقي يشرب ويسهر بيه ولا في دماغه ،
وعدت الأيام وعدي شهر وهما علي نفس النظام وبقي ياخد خاتم ورا دبله ولا إسورة وهي زي الهبلة بتديلوا ومش عايزة تسمع حد بيها ،
ولا عايزة تقول لباباها ومامتها حاجه علشان ده اختيارها ودي نتيجته ولازم تتحمل ،
وقاعده مع نفسها بتكلم نفسها وبتقول :
_ أنا إزاي اتخدعت فيه واتصدمت أوي كده ؟
إزاي ماحطتش كلام بابا في اعتباري ومشيت ورا قلبي ونزلت للمستوي المنحط ده ؟
إزاي بابا وضح لي كل الحاجات دي وطنشت وكبرت دماغي ؟
قد كده مراية الحب عامية ،
ودخل عليها السبع إللي اتجوزته وقال لها :
_ مالك قاعدة شايلة طاجن ستك كده علي راسك ومكشرة وتبوزيتك من الودن دي للودن دي ؟
بصت له بحزن وقالت له بتعب :
_ لحد امته هتفضل كده لاتبالي ولا علي بالك
مش على بالك العيشه الغريبه اللي احنا عايشينها دي،
بعت دهبي كله وانا لسه ما كملت السنه جواز علشان ناكل ونشرب وانت تتكيف،
وده كله ما بتخرجش تشتغل علشان تصرف على البني ادمه اللي انت اخذتها من بيت ابوها ووعدتها بالحياه الورديه وفي الاخر عايشه في كابوس .
رد عليها وهو حاطط ايده على دماغه وبيقول لها :
_بقول لك ايه صداع مش عايز شغل ما بشتغلش عايزه تشتغلي انت وتصرفي على البيت انت حره انا اخري هنزل اكل واشرب عند امي عايزه تشتغلي روحي اشتغلي ،
انا واحد بحب اعيش حياتي رايق ومن ساعه ما اتجوزتك وانت زن زن زن ايه يا شيخه ما بتزهقيش ما بتمليش من النكد ؟
عاجبك العيشه على كده عاجبك مش عاجبك اخبطي راسك في الحيطه ولا اقول لك الباب يفوت ميت جمل ،
بصت له وقالت له:
_تصدق ان انت ما طلعتش راجل ومعدوم الدم ومعدوم الكرامه انا ندمانه ان انا ارتبطت بواحد زيك وما سمعتش كلام بابا لما قال لي ده مش من مستواكي انا اللي جبت ده كله لنفسي .
الدم غلي في عروقه من كلامها اللي زي السم وراح نازل على وشها بالقلم وبعد الالم ضربها ضرب شديد وقال لها :
_العلقه دي علشان تفوقي لنفسك وتعرفي تتكلمي مع جوزك يا محترمه يا متربيه يا بنت الناس حسك عينك صوتك يعلي عليا تاني ولا تقولي كلامك اللي زي السم ده يا اما المره الجايه هقطع لك لسانك تاتك الغم وليه نكد .
قعده تعيط وتتوجع على حالها اللي لا يسر عدو ولا حبيب،
وما بقتش تنصدم طبعا من طريقته ولا كلامه ولا افعاله لان ما كانتش دي اول مره يمد ايده عليها،
وما ردتش عليه وسابته ودخلت الاوضه تعيط وتبكي على احزانها وما بتستجراش تقول لمامتها ولا لباباها،
وعدت الايام واضطرت انها تشتغل وترجع لمعمل التحاليل تاني وعرفت والدتها ان هي مش قادره تقعد من غير شغل وحاسه بملل وما قالتلهاش على العيشه اللي ما يعلم بها إلا ربنا اللي هي عايشه فيها ،
وهو كالعاده كل ما تقبض بياخد منها الفلوس اللي هي اصلا ما بتكفيهمش الشهر اكل ولا شرب لحد ما خست خالص ونزلت النص من الاكل القليل،
وده هو كله وراضيه وساكته وما بتتكلمش واثناء ما هي قاعده في يوم لقيت جوزها داخل عليها واول ما شافته هو واللي معاه قلبها طب وقع في رجليها وقالت له بصدمه
وده هو كله وراضيه وساكته وما بتتكلمش واثناء ما هي قاعده في يوم لقيت جوزها داخل عليها واول ما شافته هو واللي معاه قلبها طب وقع في رجليها وقالت له بصدمه وهي بتضرب على صدرها :
_مين دي اللي انت جايبها معاك ومدخلها بيتي وحاطط ايدك على كتفها بتملك شكل ما تكون اختك ولا مراتك فهمني فورا مين دي ؟
بص لها عمرو ورد عليها ببرود وقال لها :
_دي مراتي الثانيه واللي هتعيش معانا هنا في الشقه دي عاجبك ولا مش عاجبك؟
المره دي الصدمه نزلت على قلبها فلقته اثنين ولسانها تلجم وما بقتش عارفه تقول له ايه ،
وفاقت لنفسها وراحت عليه وقالت له وهي مصدومه من فعلته :
_اه يا حقير يا سافل يا ندل اتجوزت علي انا بعد كل القرف والعيشه الغم اللي انا مستحملاها معاك ،
ومتجوز من مين من دي ست قربت تجيب سن امك ؟
انا مش مصدقه نفسي ومصدومه فيك صدمه عمري،
عمري ما كنت اتخيل انك تطلع اقذر بني ادم شفته في حياتي ،
وبصت على اللي متجوزها وقالت لها :
_اتجوزت فيه ايه ده يا خايبه هيجوعك وهيعريكي وهيمرمطك زي ما هو ما بيعمل فيا كده مفكره ان تحت القبه شيخ .
بصت لها الثانيه وضحكت ضحكه خليعه وقالت لها وهي بتمسك ايد عمرو وبتغيظها :
_مش محتاجه منه يشتغل ولا محتاجه فلوس يا حبيبتي انا عندي فلوس توزنك انا كل اللي انا محتاجاه حبه وحضنه وحنانه .
خلاص ما بقتش قادره تنصدم فيه اكثر من كده كل حاجه اتوضحت قدامها وخدت الشرخ اللي هتعيش عليه طول عمرها ندمانه ومقهوره على التجربه المريره اللي عشتها معاه وقالت له :
_ياه بقى رايح تتجوز على مراتك واحده اكبر منك في السن علشان تصرف عليك انا بجد اخذت صدمات في عمري منك عمري ما كنت اتخيلها طلعت احقر بني ادم على وجه الكره الارضيه ،
وراحت تافه في وشه .
مسح التفه بتاعتها من على وشه وراح عليها ومسكها من شعرها جامد وضربها على ضهرها وعلى بطنها وقال لها بفحيح:
_اه يا زباله يا اللي ما تربتيش تصدقي انا الغلطان اللي لحد دلوقتي عايش مع واحده زيك يلا بره من هنا انتي طالق يا زباله .
وراح طاردها بره الشقه على حالها زي ما هي،
وطبعا عمرو ما لوش كبير ابوه وامه ما بيقدروش عليه نهائي وهو الصغير الدلوعه بتاعتهم،
و خرجت مهره وحالها لا يسر عدو ولا حبيب زي ما هي بشعرها المنكوش وبجسمها المضروب وبوشها اللي علامات ايده عليها وراحت على جارتها واخذت منها جلابيه وطرحه وراحت على بيت ابوها بمنظرها اللي يقطع القلب واول ما شافتها مامتها قالت لها بخضة وهي بتضرب على صدرها من منظرها :
_يا حبيبتي يا بنتي مالك فيك ايه ومين اللي عامل فيكي كده ؟
تعالي ادخلي يانن عين أمك ؟
وشدت ايديها امها ودخلتها وهي سانداها وواخداها في حضنها من منظرها اللي يقطع القلب ،
وابوها اول ما شافها جري عليها واخدها في حضنه وسالها:
_مالك يا مهره فيك ايه يا حبيبتي منظرك عامل كده ليه؟
مامتها عملت لها كوبايه عصير فريش وجابتها لها وسابوها تهدى شويه،
وبعد نص ساعه وهم حاضنينها الاثنين وقاعدين جنبها مستنينها تتكلم بصيت لهم ودموعها نازله على وشها وقالت لهم :
_انا جايه لك النهارده يا بابا وبعترف لك ان انا طلعت غلطانه وطلعت اغبى بني ادمه في الدنيا،
طلعت اغبى بني ادمه علشان ما سمعتش كلام ابويا الراجل الكبير الفاهم والواعي وهو بينصح بنته وبيرشدها للطريق الصحيح ومشيت وراء دماغها ومشيت ورا الهوا الكذاب،
راجعة لك وانا متهانه ومكسوره ومضروبه وكل احساس وحش في الدنيا راجعه لك بيه ،
راجعة لك وكل ندم على كل لحظه قضيتها من غير ما اسمع كلامك وعريضتك فيها ووقفت قصادك ودافعت عن حقير ما يستحقش اني ابيع دنيتي وحياتي الحلوه اللي عشتها في وسطكم علشان خاطره،
راجعة لك يا بابا ومن حقك تضربني وتبهدلني وتعمل فيها ما بدالك علشان ما سمعتش كلامك،
راجعي لك يا بابا وانا ما املكش شيء حتى دهبي اللي كان جايبه لي واللي انت كنت مكمل لي عليه بعته كله علشان ياكل واشرب وهو كمان ياكل ويشرب ويتكيف ،
راجعة لك يا بابا وانا مطلقه وهو متجوز عليا وطردني من بيتي وجاب واحده اكبر مني وقدي مرتين ومنيمها في اوضتي وعلى فرشي بكل جبروت،
طردني حتى من غير ما يديني حجاب البسه على راسي بلبس البيت وشحدت حجاب من جارتنا اللي جنبي وشبشب علشان اعرف اجي لكم ،
شفت يا بابا انا وصلت نفس لايه لدرجه من الانحطاط ما شفتهاش ولا هشوفها في حياتي .چ
قالت الكلام ده وفضلت تعيط جامد وتشهق من العياط وابوها اتصدم من الكلام اللي نزل على قلبه زي الصاعقه وامها طبعا ما قدرتش تشوف دموعها واخذتها في حضنها وقالت لها وهي بتطبطب على ضهرها :
_يا حبيبه امك يا ضنايا يا بنتي ده انت جعتي وما كنتيش بتتكلمي وبعتي دهبك كله علشان تاكلي وتشربي وما تكلمتيش،
وانضربتي واتهنتي وما تكلمتيش ولا جيتي فضفضتي لامك يا حبيبتي،
ونزلت تشتغلي مش زي ما كنت بتقولي عشان تتسلي لا علشان تاكلي نفسك وتشربي نفسك وتعلفي الحمار اللي كان عايش معاكي وفي كل ده مستحملاه وما تكلمتيش بس يا حبيبتي هدي اعصابك ما تعيطيش .
اما ابوها في عالم ثاني خالص مش زعلان على طلاقها لا زعلان على بنته ونور عينه اللي اتهانت وانضربت وجاعت وانطردت ،
وبنته شافته ما تكلمتش ومسهم وفكرت ان هو متضايق علشان هي اتطلقت فقالت له بوجع :
_لو انت متضايق يا بابا ان انا اطلقت ورجعت لك انا ممكن ارجع اعيش معاه واستحمل علشان ادفع ضريبه اختياري .
راح عليها ابوها واخدها في حضنه وطبطب عليها جامد لما وصل لها احساس ان ابوها زعلان انها اتطلقت وقال لها بيشدد على حضنها باحتواء:
_حبيبه ابوكي ده انت ربنا نجاكي من المرار اللي انت كنت عايشه فيه مع المتخلف ده،
هو انت فكرك ان انا ممكن اسيبك ترجعي للي ما يسواش ثلاثه تعريفه في سوق الرجاله ده والله ما بقاش راجل وشنبي ده على وشي اما جبت لك حقك منه تالث ومتلت .
قال لها الكلمتين دول وخرج من البيت راح على بيت عمرو وابوه ،
واول ما وصل قدام بيتهم كانت جيران قاعدين في الشارع على صوته في الشارع وقال :
_يا حاج ابو عمرو يا راجل يا كبير يا اللي بتفهم في الاصول اخرجي هنا في الشارع كده قدام الناس دي كلها ونتكلم عيانا بيانا ،
قال الكلمتين دول وكان معلي صوته والناس كلها انتبهت وفورا خرج ابو عمرو ومراته ومسكوه من ايديه وحاولوا يدخلوه علشان يتكلموا جوه مش قدام الناس لكن هو نفض ايديهم الاثنين وكمل بصوت عالي قدام الناس :
_انا عايزكم تشهدوا يا ناس على اللي هقوله دلوقتي الراجل ده من سنه ونص اتقدم لبنتي ووعدني انها تبقى زي بناته بالظبط وقاعد يبني لي احلام واوهام في الهوا هو وابنه،
بنتي جايه لي النهارده مكملتش سنه جواز وهي مطلقه وجوزها متجوز عليها وبايع ذهبها وكانت بتاكله وبتشربوا من شغلها ومن تعبها كان بيجي عليها ايام ما بتلاقيش الاكل تاكله كان بيجي عليها ايام بتنام كل يوم معيطه من كتر الاهانه والضرب مع الخسيس اللي كانت متجوزاه هي دي الامانه اللي انا سلمتها لك يا حاج هي دي وعود الرجاله اخص الرجاله ماتت في الحرب .
ومش بس كده ده خرجها من بيتها من غير حجابها على راسها وحافيه وطردها طرده الكلاب،
كل ده والناس عماله تسمع وتضرب كف على كف من اللي سمعوه من ابو مهره واللي يفطر القلب ،
وابو عمرو وامه واقفين كان اندلق عليهم ميه زي الثلج وعمالين يهدوا فيه ويقولوا له تعالى ندخل نتكلم جوه وهو ولا حيات لمن تنادي ،
وكمل ابو مهره وهو بيهددهم :
_واللي خلق الخلق لا هرفع قضيه في محكمه الاسره وهجيب حق بنتي منكم وهروح حالا اخدها واعمل لها تقرير طبي بالاهانه والضرب ومش بس كده ده انا هخلي اللي سلفتها تحجيبه وشبشب عشان تجي بيت ابوها تروح تشهد ان هو خرجها عريانه من بيتها وهعلمكم الادب على اصوله ومش هستريح الا لما اسجن لكم الحيله اللي خد بنات الناس وبهدلهم وما يعرفش قيمتهم،
ان ما لففتكم كعب داير على المحاكم ما بقاش انا الحاج عبد الله السباعي ولا يبقى شنبي ده على وشي .
قال الكلمتين دول وراح سايبهم وماشي بعد ما الحته كلها اتفرجت عليهم وبقت تلوم فيهم وتتغامز وتتلامز عليهم ،
وفعلا ابو مهره اخذها وعمل لها تقرير ورفع قضيه في محكمه الاسره المحامي ظبطها له زي ما قال الكتاب،
والمحضر طبعا جاب الوصل على بيت عمرو وابوه واول ما شافوه قلبهم طب في رجليهم وفورا ابو عمرو راح على بيت ابو مهره فطلب منه يقعد معاه ويحلو الموضوع ودي ،
فقال ابو عمرو لوالد مهره وهو بيستسمحه :
_انا جاي لك النهارده يا حاج عبد الله علشان خاطر نحل الموضوع ودي وبلاش المحاكم واللي انت تؤمر بيه من الف للياء انا تحت امرك .
ابو مهره كبرت في دماغه ان هو يسقينه يعني يسجنه ويخليه يدوق المرار اللي عيشه لبنته ورد عليه بكل قوه وقال له :
_ده انت بتحلم ونكون السماء اقرب لك انت وابنك زي ما بنتي اتهنت وانضربت وكانت زي السجينه في شقتها واتبهدلت بهدله وهي كانت معززه ومكرمه في بيت ابوها ابنك نفس الحكايه هيشرب من نفس الكيس اللي دوقه لبنتي ،
واللي ما ربهوش امه وابوه تربيه الايام والليالي وهسجنه يعني هسجنه وخلي بالك محكمه الاسره دلوقتي بتدي للست حقها تالت ومتلت،
ده لو هي هتطلق طلاق عادي اما بنتي بقى رايحه بتقرير مش عايزه اقول لك بقى ما يخرش الميه وابقى شوف بقى هتصرف على ابنك قد ايه في المحاكم وانا مصمم على رايي وهسجنه لك يعني هسجنه لك وابقى قابلني هناك .
قاعد ابو عمرو يجيبه يمين ويجيبوا شمال وابو مهره اللي في دماغه في دماغه ومش هيتنازل عنه ابدا وخرج وعدى كذا يوم وحاول ابو عمرو يبعت له ناس كبيره من البلد يحاولوا يتفاوضوا معاه وابو مهره اللي في دماغه في دماغه مش هيتنازل عن انه يتسجن،
وعدت الايام والقضيه شغاله زي ما هي والاثنين مهره وعمرو واقفين قدام القاضي فالقاضي بيسالها :
_هل يا بنتي جوزك ده ضربك واهانك ورمى عليكي اليمين ؟
ردت مهرة على القاضي كل قوه وابوها ساندها وقالت له وهي بتبكي بتاثر لما افتكرت الايام السوداء اللي كانت عايشاها :
_انا حضره القاضي مش انضربت بس لا ده انا جعت وتعريت واتهنت وده ما يرضيش ربنا ابدا واتجوز عليا واحده اكبر مني على سريري وعلى فرشتي وطردني من بيتي عريانه بعد ما كسر لي ضلوعي من الضرب والتقرير اللي قدام حضرتك بيقول كده فانا عايزه حق منه وبس مش عايزه اكثر من كده .
وطبعا القاضي استدعى الشاهده اللي شافتها وهي خارجه من بيتها عريانه وشهدت بالحق ما رضيتش تشهد بالزور ابدا،
والتقرير اللي كان عامله المحامي بتاع مهره كان مترتب وما فيهوش ثغرات ابدا فاتحكم على عمرو بالسجن لمده اربع سنين ،
وحكموا لها بكل مستحقاتها والقايمه وكل شيء،
وطبعا عمرو قعد يعيط ويوولول وما كانش متخيل ان الحاله هتوصل بيه للدرجه دي،
واخذت مهره كل مستحقاتها الماليه وعزالها وقايمتها واتقفلت صفحه عمرو للابد بعد ما ابوها وقف جنبها وجاب لها حقها ،
ورجعوا البيت واخذها ابوها في حضنها وهو بيقول لها :
_انا دلوقتي استريحت يا حبيبتي لما جبت لك حقك وسجنته زي ما اعمل فيك خليه يجرب عذاب السجن ومراره عشان يعرف ان الله حق وحاجتك انا هحطها لك في الشقه اللي فوق واقفل عليها وفلوس مؤخرك ودهبك اعينهم لك باسمك في البنك وربنا يخلف عليك يا بنتي بالخلف الصالح ويرزقك السعاده ويعوضك عن الشقي اللي إنتي عشتيه في السنتين دول .
وعدت الايام والشهور ومهره حابسه نفسها في البيت ما بتخرجش منه ،
وفي يوم قاعدين هي وامها وابوها وعرضت عليها امها وقالت لها :
_ايه رايك يا مهره ترجعي تشتغلي تاني في المعمل اللي انت كنت شغاله فيه وتفكي عن نفسك يا بنتي بدل الحبسه اللي انتي حبسه نفسك فيها دي وتخرجي وتشوفي الناس والناس تشوفك .
ردت عليها مهره وهي فرحانه والابتسامه شقت وشها وما كانتش تقدر تطلب الطلب ده وهي دلوقتي بقت مطلقه وقالت لها :
_بجد يا ماما انا نفسي اشتغل وارجع الشغل تاني وافك عن نفسي وكمان انا قررت اقدم في رساله الماجستير كفايه عليها تعطيل لحد كده بس كنت خايفه اطلب منكم الطلب ده وبابا يرفض .
رد عليها ابوها بابتسامه وقال لها بحنان وهو حاضنها :
_وابوكي يفضليه يا حبيبتي هو انت كنت عملت جريمه ولا عملت جريمه انا مش من الابهات اللي دماغها مقفله واللي تقول المطلقه ما تخرجش من البيت لا يا حبيبتي اخرجي واشتغلي واتعلمي وعيشي حياتك انت لسه صغيره وفي عز شبابك واذا كان على تجربتك اللي فاتت ساعات ربنا بيبعت لنا اختبار علشان يشوفنا هنصبر ولا لا ويختبر ايماننا فده مش اخر الكون عندك ربنا بيخلق لنا من وسط المحن منح وكل حاجه مفكرينها انها هتضرنا وانها وحشه لينا ساعات بتبقى كل الخير وانا واثق ان ربنا هيعوضك العوض الجميل اللي هيفرح قلبك ويرزقك السعاده يا حبيبتي .
فرحه مهره من كلام ابوها وحست بالامل في حياتها ورجعت اشتغلت في المعمل تاني وقدمت على رساله الماجستير وبدات حياتها ما بين الشغل والدراسه وروحها اتردت لها تاني ،
وعدى كذا شهر على مهره وهي بتذاكر مجتهده جدا وشهر ورا شهر ورا شهر لحد مامر عليها سنه ونص وجه ميعاد مناقشه الماجستير بتاعتها،
وكان ابوها وامها واقفين جنبها ومسندينها لحد ما المحاضر قال لها نتيجه الماجستير امتياز مع مرتبه الشرف ،
جريت أمها عليها وحضنتها وقالت لها:
_مبروك يا حبيبتي مبروك يا دكتوره مهره تلبق لك الدكتوراه والله يا جميله الجميلات .
وأبوها راح عليها ودموع الفرحه في عينيه وحضنها وقال لها :
_الف مبروك يا احلى دكتوره في الدنيا وان شاء الله الدكتوراه عن قريب يا حبيبه ابوكي ،
يا اللي مشرفاني ورافعة راسي .
وعدت الايام على مهره وقدمت في رساله الدكتوره على طول وبتذاكر بكل جهدها واثناء ما هي قاعده في معمل التحاليل ماسكه مرجع بتراجع فيه دخل عليها واحد مسند مامته،
قامت عليهم مهره بوشها البشوش ومسكت ايديها وقعدتها على الكرسي وقالت لها :
_الف سلامه عليكي يا حاجه اقعدي استريحي الاول وخدي نفسك .
ابنها اول ما دخل وشاف مهره قلبه دق دقات شديده من اول نظره بص لها فيها ولما سمع صوتها ورقتها وهي بتتكلم داب وفضل متنح لها لحد ما سمعها وهي بتسأله :
_لو سمحت يا باشمهندس عماله اسالك التحاليل ايه الحاجة عايزاها وانت مش هنا خالص .
بص لها بتوهان ورد عليها بابتسامه خفيفه وقال لها :
_معلش حقك عليا انا اسف يا انسه ما اخذتش بالي والله هي عايزه تعمل تحليل دم كامل .
قال لها الكلمتين دول وهو متنح لها وباصص في عينيها ومش قادر ينزل عينه من عليها شكل ما يكون عيونها اسرته وملامحها بيحفرهم جواه كل ده في دقائق بس من ساعه ما دخل ،
وعملت مهره التحاليل وطلبت منه ان هو يجي بالليل يستلمها،
فهو طلب منها الرقم الخاص بيها او بالمعمل علشان خاطر قبل ما يجي يشوف جهزت ولا لا ،
وهي اديته الرقم الخاص بتاع العياده ،
وهي بعد اما خرج كلمت نفسها وقالت :
_هو ايه البني ادم ده من ساعه ما دخل وهو سرحان وغريب بجد ما شفتش حد كده قبل كده .
وبعدين كملت شغلها المعتاد بعد كل تحليل وقعدت تذاكر وبعد اربع ساعات رن التليفون فرديت عليه وقالت:
ايوه السلام عليكم،
مين معايا ؟
اول ما سمع صوتها جواد قال لها بتلقائيه :
_يا نهار ابيض يعني الرقه مش في الشكل بس ده طلعت في الصوت كمان .
بعدت مهره التليفون عن ودانها واستغربت من الكلمتين اللي سمعتهم ورجعت وقالت له :
_ نعم يافندم ؟
فاق جواد من كلامه وسرحانه وقال لها :
_انا بتاسف جدا يا انسه انا بتصل عشان اسال عن تحاليل الست الوالده جاهزه اجي اخدها ولا لا .
سالته عن الاسم علشان هي مش عارفه هو مين او عملت نفسها مش عارفه هو مين وقال لها :
_انا اسمي جواد العربي اللي جيت انا ووالدتي النهارده الحاجه فاطمه كده عرفتينا ولا لا .
ردت عليه مهره وقالت له :
_اه افتكرت حضرتك التحاليل جاهزه تقدر تيجي تاخدها .
زعل جدا لما قالت له افتكرت حضرتك كان مفكر ان هي عارفاه ومش عارف ايه اللي زعله ليه كده،
قفل معاها وما فيش ربع ساعه كان قدامها بياخد منها التحاليل،
فهو بياخد منها التحاليل قال لها وهو باصص جوه عينيها بعمق :
_معقوله العيون الجميله دي واللي لمعتهم تسحر وتشد فيها لمحه حزن مش مفهومه يا ترى ايه سببها .
سالها السؤال ده بتلقائيه وهو مش عارف سبب انه مشدود ليها بالشكل ده ليه،
اما هي قلبها دق من سؤاله بالطريقه دي ان هو ازاي عرف حزنها وقراه جوه عينيها في لحظه وردت عليه بنفس التلقائيه:
_الحزن هيفضل طول عمره طريقي وهيفضل ملازمني والفرح شكله خلاص خاصمني والدنيا بقت معانداني .
رد عليها جواد وقال لها وهو حزين على كلامها:
_بقى الوش الجميل الهادي ده والكيان الرقيق اللي قدامي ده يكون شايل في قلبه الحزن ده كله؟
فاقت لنفسها ولكلامه وقالت له بجديه :
_كده التحاليل مع حضرتك تمام يا فندم وربنا يشفي الست الوالده اي اوامر مني ثانيه؟
زعل جدا انها غيرت الموضوع وما حبش انه يضغط عليها وشكرها وسابها وخرج،
وسبحان الله ربنا مقلب القلوب كان داخل وهو يعمل التحاليل لوالدته وخرج بقلب مشغول بيفكر ازاي يوصل للملاك الحزين اللي ملامحه اتحفرت جوه قلبه من نظره عين ،
وطبعا جواد فضل يسال عليها اللي يعرفه واللي ما يعرفوش لحد ما عرف قصتها كلها،
وفضل يلف يمين وشمال على حد قريب منها وهو يعرفه لحد ما وصل لرقمها الخاص،
وبعت لها رساله على الوتساب وهو بيقول لها :
_ازيك يا مهره اخبارك ايه؟
انا الباشمهندس جواد اللي جيت عملت لوالدتي التحاليل عندكم من اسبوعين ،
انا عارف ان انت مستغربه انا جبت رقمك منين بس انا بجد عايز اتكلم معاكي وبكل احترام وادب .
وصلت الرساله لمهرة وفتحتها وقراءتها باستغراب وكلمت نفسها وقالت :
_يا ترى البني ادم ده عايز مني ايه وجاب رقمي منين وارد عليه ولا ما اردش .
في الاخر بعثت له رساله وقالت له:
_يا ترى حضرتك جبت رقمي منين علشان تبعث لي على تليفوني الخاص ؟
جاوبها جواد على طول وقال لها :
_اظن ان اليومين دول الواحد لو عايز رقم اي حد هيوصل له بسهوله جدا يا دكتورة مهره،
وانا والله العظيم مش بتصل علشان اتسلى او اقتحم حياتك كده ولا انا من النوع اللي بيتصل يشاغل البنات وخلاص،
كل اللي انا طالبه منك فرصه نتكلم فيها مع بعض شويه بكل تحضر .
ردت عليه مهره وقالت له بوجع مالي قلبها :
_انت تعرف ايه عني علشان خاطر تطلب تكلمني انا لا اصلح اني اتكلم او اتناقش مع اي حد انا باختصار حطام انثى .
اتوجع جدا من جواه علشانها هو اتاكد في الاسبوعين دول ان معجب بيها ومشدود لها جدا ومش عارف يسيطر على نفسه وقال لها:
_ليه بتقولي كده يا دكتوره ليه بصه للجانب الوحش في حياتك ؟
ليه تسمحي لتجربه مريره تدمر لك شبابك واللي باقي من حياتك ؟
ما تستغربيش انا بتكلم معاكي وعارف تجربتك المريره اللي انت عشتيها انا بصراحه من غير لف ودوران سالت عليك وعرفت عنك كل حاجه وما فرقش معايا كون انك مطلقه او انسه او اي حاجه انا انا عايز اتكلم معاكي انت كمهره وشخصها مش على تجربتك السيئه اللي انت عشتيها لان دي ما تخصنيش ولا تخص اي حد .
مش عارفه قلبها حس بارتياح ليه لما اتكلمت معاه الكلام البسيط ده وقرأت كلامه ،
لكن رجعت افتكرت انها كانت بترتاح مع عمرو كده برده وبترتاح في كلامه وخلاص هي فقدت الثقه في اي حد وردت عليه وقالت له وهي بتنهي الكلام معاه :
_من الافضل ان انت تبعد عني خالص لاني فقدت الثقه في نفسي وفي اي حد هيتعامل معايا،
فانا مش هدي فرصه للحديث وانا معاك ولا مع غيرك لاني بقيت مهزوزه من جوايا وما بقيتش افرق بين الحلو والوحش،
علشان اللي عيني بتشوفهم حلوين وقمه في الجدعنه والرجوله بيطلعوا العكس خالص فلو سمحت ما تبعتليش تاني واحترم رغبتي .
ازاداد وجعه عليها وبعت لها:
_ليه تخلي تجربه زي دي تحطمك وتخسرك الباقي من عمرك؟
ليه تخلي شريط حياتك القديم في خيالك وما تمسحيهوش وما تهكريهوش من ذاكرتك ؟
ليه تخلي الذكريات القديمه تتحكم فيكي وتخليكي ما تفرقيش بين الوحش والحلو ؟
انا عايز اتكلم معاكي بصراحه انا مشدود ليكي من اول نظره عين حسيت ان قلبي بيناديني ليكي وبيشدني ناحيتك،
حاولت اقاوم الاحساس ده يوم واثنين وثلاثه لكن ما قدرتش ولقتني بسال عليك وبدور عليكي في كل مكان لحد ما عرفت عنك كل حاجه ،
وعرفت قصتك ومقصرتش عليا وما وقفتش تفكيري فيكي ولو ثانيه بل بالعكس حسيت بخوف عليك وعلى احساسك اللي انت عشتيه من تجربتك دي حسيت اني نفسي اروح اخنق البني ادم اللي عمل فيك كده وفي نفس الوقت حبيت ان انتي مش مرتبطه بشخص ،
انا كنت برفض اي عروسه ماما بتجيبها لي علشان مش عايز اي واحده والسلام،
كنت دايما مستني النصيب اللي ربنا هيعلقني بيه وهيخليني ماسك فيه بايديا وسناني ومش عايز اسيبه ،
ولما شفتك قلبي تعلق بقلبك وحسيت ان انت النصيب الحلو اللي ربنا بعته لي،
انا خريج هندسه الكترونيات وشغال في شركه عالميه هنا،
وبجد عايزني ناخد فرصه مع بعض ويا ريت تفكري قبل ما تردي عليا .
لأني بجد نفسي تدينا فرصه نقرب من بعض ولعل ربنا يوفق القلوب على بعضها .
قراءت مهره كلامه واستنت شويه وبعدين ردت عليه وقالت له :
_حرام ان انت تظلم نفسك مع واحده زي مش هتستفاد من المعامله معاها غير وجع القلب وتعب الاعصاب انا مش بني ادمه طبيعيه زي اي واحده هترتبط بيها،
انا بقيت معقده من جوايا وكرهه اي علاقه مع اي راجل مش عيبا في شخصك والله يا استاذ جواد خالص،
المشكله فيينا اني مش هقدر ادخل علاقه جديده وأغامر بنفسي تاني ،
فالافضل ليك ان ربنا يجمعك بواحده تكون انت اول النصيب في حياتها وتليق بيك وبمستواك .
رد عليها جواد على طول وقال لها برغبه :
_مين قال ان انت ما ينفعش تبقي نصيبي؟
مين قال انك مش من مستوايا ؟
انا شايفك ان انت تستاهلي احسن حد في الدنيا،
رغم اني ما اتكلمتش معاكي اصلا بس هدوئك وروحك الحلوه اللي بتتعاملي بيها مع الناس لما شفتك في المعمل كفيله انها تحفرك جوه قلبي،
غير انك حضرتي الماجستير وبقيتي دكتوره ،
وحاليا بتدرسي الدكتوراه،
وعايزه اعرفك حاجه مهمه كمان مش انا اللي اتنازل عن حبي وعن احساسي اللي قعدت ادور عليه سنين وما وقع قدامي وقلبي حسه وعيني بقت تدور عليه في كل مكان اني اسيبه يضيع من بين ايديا بسهوله .
انا هدي لك فرصه تفكري مره واثنين وثلاثه وعشره وتسالي واعرفي لاني مش هتخلي عنك ولا هسيبك .
بقت مهره محتاره مش عارفه تعمل ايه ولا ترد بايه هي من جواها حاسه انه صادق لكن ترجع تكذب نفسها وتلوم نفسها انها ازاي تحكم عليه وهي ما بتعرفش تحكم على حد،
وعدت الايام على مهره وجواد هو ما بيبطلش تفكير فيها وهي نسيت كلامه اصلا وما بتحاولش انها تفكر فيه علشان موضوع الجواز ده منتهي بالنسبه لها لحد ما في يوم بتقلب في فيسبوك بتاعها ولقت جواد باعت لها طلب صداقه،
فكرت شويه وبعدين قبلت الطلب وهي مش عارفه سبب قبولها للطلب ايه ،
وعدت عليها الايام وجواد سايبها وما بيبعتلهاش خالص وهي طبعا فكرت وجه في بالها ان هو راجع نفسه ولقى ان هي ما تنفعهوش،
فبصت على فيسبوك لقيته منزل منشور وكاتب فيه وقراءته بصوت عالي كان محتواه :
_ساعات بنقابل ناس صدفه وبتبقى اجمل صدفه بتتحفر في قلوبنا وعمرها ما بتتنسي،
وبيفضل مكانهم في قلبنا معلم مهما كانوا بعاد ومش كل يوم الواحد يقابل حد مكانه يعلم في القلب فعلشان كده مش هنفرط فيهم بسهوله ولا هنسيبهم ،
ومن بعدهم صوتهم بيوحشنا واحساسهم بيوصل لنا وضحكتهم مرسومه في قلبنا ومخليانا مكملين ،
وكلامي هنا مقصود لملكه القلب ومليكته وحط جنب الكلام حرف الاتش بالانجليزي وجنبه قلب .
كلامه اثر في قلبها واتحفر جواه بس برده مهزوزه فقررت ان هو لو كلمها تاني تبعته لباباها وهو اللي يقرر وهتعمل اللي هو هيقول عليه مش هتغلط الغلطه دي تاني هو ادرى منها بالحلو والوحش .
وما كملتش تفكيرها كتير بصت لقيته باعت لها رساله وبيقول لها فيها :
_طبعا مفكراني ان انا مطنشك ورجعت في كلامي معاكي واني كنت بقول اي كلام وخلاص،
انا بس سبتك تفكري براحتك وتدوري الموضوع في دماغك بدون ضغط مني لاني ما مقتنعش بمقوله الزن على الودان امر من السحر ،
يا ترى لسه قلبك محنش على جواد عشان تدي له فرصه ان احنا نقرب ؟
انا بجد نفسي ناخد فرصه مع بعض من الاخر انا نفسي تكوني ليا يا احلى مهره شافتها عينيا .
ابتسمت بحاليميه وجاوبته بكلمتين اثنين وقالت له :
_تقدر تيجي تتقدم لبابا واللي هو يشوفه يقول عليه انا هنفذه بالحرف الواحد .
طار جواد من الفرحه وما فيش يومين وكان متقدم لمهره وبعد والده يكلم والدها وطلعوا يعرفوا بعض من زمان وكانو اصحاب بس السنين لهيتهم وما بقوما بقوش يشوفوا بعض ،
طبعا ابو مهره سال عن جواد بدقه ناس كثير جدا وكلهم اجمعوا انه محترم جدا وشاب خلوق وعلى تدين،
وبلغ بنته وقال لها :
_انا دلوقتي يا بنتي اتقدم لك عريس وما رضيتش اقول لك عليه الا لما اسال كويس جدا مره واثنين وثلاثه والحق يتقال الشاب طلع متدين وعلى اخلاق عاليه فتوكلي على الله وانسي الماضي الأليم اللي انت عشتيه وتقدمي خطوتك بكل ثقه في الله .
وسمعت مهره كلام والدها واتخطبت له واول جواد ما قعد معاها اول قاعده قال لها وهو باصص في عيونها بكل الحب والتمني :
_ القمر إللي لما يطل الطلة كله يقول ماشاء الله ، إيه الحلاوة والجمال ده ياقلب الجواد ونبضه ،
وكمل بوله:
_ مبروك لقلبي إللي نال أحلي مهرة ، مبروك لينا ياحبيبي.
دق قلبها بوتيرة سريعة جداً وردت بإستحياء:
_ الله يبارك فيك ياجواد .
ردد هو بدعابة:
_ ياعيني عليك ياجواد من أول دقيقة ودبت آمال هتستني الست شهور دول بحالهم إزاي ؟
بصت له بابتسامة وهي بتفرك ايديها بخجل ،
وما قدرتش تنطق ولا كلمه وترد علي كلامه
بص لها بتساؤل :
_ مبسوطة يامهرتي ؟
رفعت راسها علي إستحياء وعيونها جوه عيونه وقالت:
_ مبسوطة جداً ياجواد ربنا يبارك لي فيك ويكمل لنا على خير يارب .
رد عليها جواد وقال لها:
_ياه ما كنتش مصدق اني احب وادوب واعشق بالشكل ده ربنا يخليكي لقلبي ويحفظك يا مهره الجواد .
وكملت مهره مع جواد واتجوزوا واخذت الدكتوراه وعاشوا حياتهم في هدوء وراحه بال وكان جواد العوض الجميل اللي ربنا بعته لها .
